طالبت رئيسة حزب الجمهورية الثالثة ألفة الحامدي اليوم الأربعاء 31 أوت 2022، خلال حضورها في برنامج في 90 دقيقة على إي اف أم، من رئيسة حزب الدستوري الحر عبير موسي بالابتعاد عنها وعدم الحديث عنها.

وقالت الحامدي:" عمري ما جبدتها عبير موسي أنا مازلت ما عملتش حتى خطاب الإعلان في 24 فيفري 2022... ساعة كاملة مازلت ما أعلنتش خرجت المرا تحكي عليا وتسب فيا، يا أخي ماعادش تدور بيا يعيشك ماللخر... راهو اللي سميتهم مع احترامي بالنسبة ليا هاذي مدارس سياسية أكل عليها الدهر وشرب وبالنسبة سميتهم في الروتروفيزور... أنا قلت الصراع بين الإسلاميين والحداثيين بمشموله العام لازم ينتهي في تونس عنا فوق الـ100 عام نعانيو فيه في تونس يزينا...عنا العقلية هاذيا في السياسة متاع التبعية تقولش كل واحد فينا عندو قطيع والقطيع هذاكا يحكم فيه وبش يجي شكون بش يهزه يا ودلي يزي احترمو الناس، أنا نقلهم في الجمهورية الثالثة الناس اللي تدخل راكم الكلهم عندكم نفس القيمة مكش داخل على خاطري وعلى خاطر فلتان أدخل أمن بروحك برا أقنع الناس، عندي رسالة للشباب في الدستوري والنهضة سيب عليكم مالأحزاب هاذي ما عندكمش فيها مستقبل... حزب النهضة مثلا بش تترشح لرئاسة الحركة لازمك على الأقل 20 سنة عضو في الحزب معناها الشباب ماعندهمش مستقبل في الحركة هاذيكا مثلا، الحزب الحر الدستوري أقرا النظام الأساسي نظام لا مجال فيه للتعددية وللاختلفا وللتعبير ولا حتى للظهور، إيجا لحزب الجمهورية الثالثة، الحزب يقدر الناس اللي عندها تجربة سياسية وأنا نحترم الشباب اللي خدموا في الأحزاب هاذيا على خاطر جربوا تعلموا، الأحزاب الكل ما عنديش مشكلة أنا كل انسان عمل السياسة بالنسبة ليا ومشا ودخل وعاون بالنسبة ليا نحترم تجربتو، بالعكس نعتبره حاجة باهية  تكون الشخصية هاذيكا... آش عندكم في حزب الجمهورية الثالثة عندكم حرية مش أكثر من حرية التعبير، الاختلاف عادي، عندكم الهياكل متكونة بطريقة اللي تنجم تطلع انت تكون ما عندكش ماضي سياسي ووجه غير معروف، تلقا روحك في المنصة هاذي تطلع، أنا موجودة لهنا بش نطلع، إذن بش تلقاو رواحكم في إطار حزب برامجي في قوة سياسية جديدة اللي تنجم في وقت قصير تبني فيها روحك تبان فيها وتبين فيها شخصيتك، هذا ما تلقاشي في الأحزاب الأخرى".