تحدث مدير الديوان الأسبق لكل من محمد الغنوشي والباجي قايد السبسي الدكتور الطيب اليوسفي، اليوم الخميس 12 جانفي 2023، عن كتابه الجديد دولة الغنيمة، والذي تطرق فيه إلى عدة مراجل تاريخية، قبل الثورة وبعد الثورة.

وقال اليوسفي:" في 18 نوفمبر 2011 استقبل الباجي قايد السبسي بعض قيادات النهضة، راشد الغنوشي وحمادي الجبالي ونور الدين البحيري، بش يعملوه بهندسة السلطة، على أساس الترويكا بش تتولى الحكم بعد انتخابات المجلس التأسيسي، وقتها في اليوم الموالي ذكر حرفيا أنهم ماشين للفشل، وكان يتنبأ أنو الصعوبات بش تتفاقم، والمجلس الوطني التأسيسي مش معناها النهاية بل بالعكس، بدات تتعمق الأزمة الاقتصادية والاجتماعية، وتعرف في 2011 و2012 الدولة كان في خزينتها الكثير، كانوا الجماعة يصرفو من هنا وهناك ومبعد جات ساعة الحقيقة"...
كما كشف الدكتور الطيب اليوسفي معلومات لم يعرفها الكثيرون حول الشهيد شكري بلعيد وعلاقته بالحبيب الصيد:" شكري بلعيد خطاباتو ومداخلاتو اتسمت بالواقعية والبراغماتية ومعرفة شؤون الدولة، وكان دائما يشيد بدور الإدارة التونسية في الحفاظ على الدولة واستمراريتها، لأنه ما لا يعلمه الكثيرون أن شكري بلعيد كانت عندو علاقة متميزة مع الحبيب الصيد عندما كان وزيرا للداخلية، توطدت العلاقة في استقبال وزير الداخلية للأحزاب حتى أصبحت علاقة خاصة، حتى بعد خروج الحبيب الصيد من وزارة الداخلية، ثم أكثر من ذلك أنو شكري بلعيد وأنا في ديوان الباجي قايد السبسي كان يجي للوزارة الأولى بش يضطلع يفهم الدولة يفهم سير الإدارة، يفهم كيف الإدارة، خاطر هو سقط النظام وبقيت الدولة، مش ساهل أو بقدرة قادر بقيت الدولة، هذاكا علاش عندو الاطلاع وولات خطاباتو هذاكا ساهم في سعة اضطلاعو على الأوضاع ومعرفتو بالدولة وبدواخلها"...