قدم زهير المغزاوي أمين عام حركة الشعب اليوم الأربعاء 7 سبتمبر 2022، خلال حضوره في برنامج في 90 دقيقة على إي أف أم، تفسيرا لعبارة روح 25 جويلية، مشددا أن حزبه قد اختلف فيها حتى مع رئيس الجمهورية.

وقال المغزاوي:" فما ناس مش قاعدة تتبع في خطابنا... الناس اللي يتبعو في خطابنا منذ 25 جويلية إلى حد الآن، فيه روح خطابنا، أنو 25 جويلية بعدها الأساس هو اقتصادي واجتماعي، هذا روح 25 جويلية بالنسبة لينا أحنا، خلي نزيد نفسرها شوية، أحنا بالنسبة لينا العباد اللي خرجت نهارت 25 جويلية وقبل 25 جويلية واللي خرجو في جانفي ضد قانون المالية خرجوا لأنو فما مطالب للثورة التونسية استمرت 10 سنوات الناس تنتظر في تحقيقها لم يتحقق منها أي شيء خاصة المطالب الاجتماعية والاقتصادية، إذن منذ اليوم الأول نهار 25 جويلية من شهر أوت ونحن نوجه في خطابنا للسيد رئيس الجمهورية ولكل شركائنا في هذا المسار أنو راهو علاش حتى بكري وقتلي حكيتلك، احنا سلمنالو وثيقة مكتوبة الرئيس فيها النقاط هاذي الكل، وهاذا علاش قلت مبكري راهو الانتخابات متاع 17 ديسمبر ما ننتظروش أنها تكون ناجحة إذا كان ما نعطيوش أهمية قصوى للمسار الاقتصادي والاجتماعي، معنتها الناس الجواعة اليوم واللي قص عليهم الضو واللي مش لاقيين كيفاش بش يقريوا ولادهم في العودة المدرسية واللي يخمم كيفاش يجيب ولدو من قبلي ولا من قابس يدبرلو ومش لاقي حتى حل ويخمم، راهو هذاكا مش بش يمشي لصندوق الاقتراع، صندوق الاقتراع مش ممارسة رياضية يمارسو فيها العباد، صندوق الاقتراع يمشيولو العباد بش يغيروا أوضاعهم وحياتهم وقتلي يتوفر نوع من الثقة في العملية السياسية، أحنا وين اليوم أحنا كنا في عملية سياسية استمرت 10 سنوات نحن في تقديرنا وتقييمنا واللي نتفقو فيه مع رئيس الجمهورية ومع عديد التونسيين والتونسيات أنها كانت عملية سياسية فاشلة، فشلت في أن تضع على رأس جدول أعمالها انتظارات الناس، فشلت جات 25 جويلية بدينا عملية سياسية جديدة، شنوة المطلوب في العملية السياسية الجديدة هاذيا العملية السياسية الجديدة يجب أن تكون في خدمة الناس، إذا ما كانتش في خدمة الناس سيكون مآلها الفشل كما كان مآل الفشل العملية السياسية اللي قبلها إذن هذا هو روح 25 جويلية بالنسبة لحركة الشعب"...