أكد رئيس مصلحة شؤون التلاميذ بالمندوبية الجهوية للتربية ببن عروس توفيق المسعودي اليوم الثلاثاء 25 أكتوبر 2022، في مداخلة هاتفية مع برنامج في 90 دقيقة على إي أف أم، أن السلطات الأمنية تحركت من تلقاء نفسها لإنهاء الشغب الذي شهده محيط معهد حي الأمل بفوشانة وسط الأسبوع الفارط، دون أن يقع الاتصال بها من قبل مدير المعهد. 

وقال المسعودي:" قبل كل شي هاذوما أولادنا، غايضنا حالهم في الحبس وماذابينا  يخرجوا قبل اليوم وماذابينا القضاء يبرأهم إن شاء الله، يومي الثلاثاء والأربعاء اللي فاتت تمت وقفة احتجاجية أمام المعهد خارج الأسوار، حول ما يقولون أنو فما تصدعات وشقوق ببعض قاعات التدريس، وسوء الحالة متاع المجموعات الصحية، خرجوا احتجاج عادي أمام المعهد، إلا أنو سرعان ما تطورت الاحتجاجات لإشعال عجلات مطاطية، هنا مجموعة من التلامذة مش الكل، أصبح يشكل خطورة على تلامذتنا خاصة المحيط حي شعبي كبير فيه عدد سكاني كبير، وبحذوه معهد آخر اللي هي مدرسة اعدادية فوشانة فيها سنة أولى ثانوي فيها 1800 تلميذ، معناها ينجم العملية هاذيا تشكل خطر كبير على سلامة وليداتنا التلامذة، بعد مدة من اشتعال العجلات المطاطية تدخلت السلطات الأمنية لكف هذا الشغب، وتدخلو بسرعة وانتهت العملية ولاباس الحمد لله، بعد مدة السلط الأمنية اتصلو بإدارة المؤسسة، جايبين معاهم مجموعة من الصور وصلتهم بطرقهم هوما، الطرق الأمنية متاعهم، عندهم صور لمجموعة من تلاميذ المعهد غادي اللي هوما يحملون زجاجات حارقة، وهذا الخطر اللي خلا الأمن تدخل بسرعة لحماية التلامذة الساعة من أنفسهم، لا مدير المؤسسة لم يتصل بالأمن، الأمن كان موجود غادي وجاء لكف الشغب وحاول يبعد الوليدات، العملة الكلها تمت خارج المعهد، حتى التلامذة كي تم توقيفهم تم توقيفهم من منازلهم، الأمن اتصل بيهم مشا حتى للأحياء متاعهم، وعندهم الصور وخايفين لا يعملو جريمة كبيرة تصور كان لا قدر الله يتحرقوا بعض التلامذة والحي والليسي وكانوا مشكورين السلط الأمنية أنو تصدوا... أحنا الوليدات هاذوما حوالي 10 تم إيقافهم، تم تسريح 6 من 10 اللي ربما ما عندهم مشكلة بعلاقة بالحادثة بقاو 4 هوما على ذمة التحقيق على ذمة القضاء وإن شاء الله يبرأهم، إن شاء الله أحنا ولادنا مش متشمتين بيهم... بكل صدق ما عنا ما نخفوا شي، هي البنية التحتية متاع جل مدارسنا فيهم صعوبات، الصعوبة الموجودة أنو فما شقوق صحيح في بعض قاعات التدريس إلا أنا لا تشكل خطرا... الشقوق بالعين المجردة تبدو شقوق ربما تشكل خطر إلا أن وزارة التربية عنا مركز صيانة اتصل من عمناول مالصائفة وعاين حالات البنية التحتية... أحنا نربيوا ولادنا على التعبير السلمي وعلى إعطاء الرأي بالديمقراطية والمواطنة ماناش ضد، فما طريقة تعبير يلزم تكون سلمية... هو وزارة التربية قامت برصد مبلغ مالي هام قدرو 600 ألف دينار لصيانة شاملة لمعهد حي الأمل بفوشانة، وهذا سابق منذ شهر ماي اللي فات ونستنو توة هو المرحلة توة في مرحلة الدراسات الفنية، وستنطلق الأشغال ربما متأخرة شوية لإجراءات فنية إدارية ولكن 600 ألف دينار لصيانة القاعات والمجموعات الصحية، وفرنا 600 ألف دينار ولكن الوضعية صعبة صحيح... نقلك فيها شقوق ولكن لا تشكل خطر... هناك مكتب دراسات فني ومهندسين خرجوا لمعاينة القاعات وعملوا إجراءات تقنية حول مدى خطورة هذه القاعات وعطاونا تقرير هذه القاعات لا تشكل أي خطر على سلامة التلاميذ، وتحمل مكتب الدراسات المسؤولية مناعو في التقرير اللي قدمهولنا"...