تحصل برنامج في 90 دقيقة على إي أف أم، على تصريح حصري للوزير الأسبق والقيادي السابق في حركة النهضة رفيق عبد السلام، علق فيه على الحكم الغيابي بالسجن لمدة 5 سنوات الصادر ضده، من أجل نشر الأخبار الزائفة والإساءة إلى الغير عبر مواقع التواصل الاجتماعي.

وقال عبد السلام:" الحكم هذا في حد ذاتو دليل قاطع على أن تونس تعيش نظام دكتاتوري مستبد يوظف القضاء ويستخدم في القضاء لضرب خصومو السياسيين، بحق وبباطل لأنو بحثو وبربشوا وما لقاو حتى شي برة نستخدمو موضوع نشر الأخبار الزائفة، شنوة الخبر الزائف اللي يتحدثو عليه، اللي هو فلان الفلاني كتب تدوينة قال راهو تم استخدام رصيد أموال البريد التونسي لدفع الجرايات، وهاذي هي حقيقة يعلمها القاصي والداني، هوما استخدموا أموال الناس، رصيد التوانسة في البريد التونسي بش يدفعوا الشهريات متاع التوانسة، كيما توة استخدموا معناها ما يسمى بالأموال المجمدة لمدة 15 سنة قالوا تستولى عليهم الدولة، هذا الكلو دليل على أن النظام هذا، نظام قاعد يستخدم في القضاء يوظف فيه في أغراضو وأهواؤو وقاعد يستغل في الأزمة متاع غ/*زة، الناس منشغلة بموضوع غ*/زة بش يوجه أحكام معناها يضرب خصومو قضائيا".