اتهم رئيس مجمع انتاج الطاقة المتجددة في جامعة البلديات، وصاحب مشروع لإنتاج الكهرباء من الطاقة المتجددة عبد اللطيف حمودة اليوم الجمعة 10 جوان 2022، خلال حضوره في برنامج في 90 دقيقة على إي أف أم، نقابة الستاغ بتعطيل تقدم وتطور برامج استغلال الطاقات المتجددة في تونس.

وأشار حمودة إلى أن موقف النقابة تسبب في خسارة تونس لأموال طائلة كان من الممكن تحقيقها، إلى جانب حرمان الآلاف من مواطن شغل مباشرة وغير مباشرة.
وفيما يلي أهم ما جاء في تصريحات ضيف البرنامج:"
فما فرق بين شكون ما يحبش المجال ينتعش وفما فرق بين الجهل راهو مصيبة كبيرة وبيناتهم فرق كبير وما نشكش لحظة في كوادر الستاغ إنهم يحبو الشي هذا، الناس فاهمة المشكلة توة كي نجبدوها النقابة رفضت إنها تعمل ربط بالشبكات، بالطبيعة البقية اللي حبوا يعملو مشاريع خافو... النقابة قاتلك هالقانون اللي تتفاهم فيه الدولة مع الخواص مباشرة دون المرور بالستاغ وتكري الشبكة فقط، قاتلك لا الشاري الوحيد لإنتاج الطاقة من الخواص هي الستاغ تبقى، والمونوبول عندها، هذا النقابة أش قالت، نحنا ما عندناش مشكلة هذا حلو فيه مشكلتكم مع الوزارة أحنا بالنسبة لينا نحنا في منظومة أخرى خلي الناس تخدم، سواء من الإنتاج الذاتي ولا نظام اللزمات ولا التراخيص للأسف حطو الكل فرد شكارة، شكون يحكم في الشي هذا مش يحكم فيها اللي يفهم قيمتها، بالنسبة ليا توة نشك خاطر في بالنا المشكلة تحلت أخيرا وسي الطبوبي قال نحلو المشكلة ورانا بش نربطو بالناس هاذيا، ولينا نشكو بالحق القواعد ولت تحكم... أحنا وصلنا المشكل الطاقي تدمرنا فيه نحكيلك مش كمنتج، الشركات الكل قريب تسكر وشطرها هربت وأحنا التوانسة نلوجو في إفريقيا وين نخدمو لأنو اليوم كان سيبولنا ال500 ميغا في الصحراء كانت تنجم تخدم آلاف مواطن الشغل اللي يقعدوا هنا شركاتنا داخلين، مهندسينا في الدراسات، تعرف شمعناها 500 فلتت و500 جديدة بش تهبط كان يسيبوها تاو نوليو الناس الكل نخدمو سامحني أنا عندي أكثر من 70 تقني بش يتطردو... 3 سنين وأحنا نستناو وكنا بش نخدمو بش نصحو العقد 10 ميغا مش كان أنا أنا نمثل الشركات التونسية... الطاقة متاع المواطنين الشمس فوق منا وأحنا ما نستغلوهاش... راهو امخر برشا المواطن لازم يفهم انو امخر بش ما نطوروش في الطاقات المتجددة عيب نقعدو لليوم، الجزائر بدات البارح في الأيام بعدنا ورغم اللي عندها الغاز وفاتتنا وعملت 10 أضعاف اللي عملناه أحنا في إنتاج الكهرباء بالطاقة الشمسية، أحنا من آخر الدول في العالم في الطاقات المتجددة الدول الافريقية امس في الأيام فاتتنا وهانا نخدمو عندهم ناكلو في الخبز، اللي نحنا انجمو نعملو مشاريعنا فما 10 آلاف موطن شغل ضايعين وعائدات الاستثمارات بالنسبة للدولة راهو مشاريع كبرى كي نقولو 1 ميغا 1 مليون أورو، 500 ميغا راهو 500 مليون أورو معناها كي نقولو ال2000 اللي صححتهم الوزارة أخيرا وكان ما نعملوهاش وما نخلوهاش تتعمل بش نوخرو
شفت سعر الضو اليوم قداش راهو بش يولي 3 و4 أضعاف السعر عالمواطن، الدول في العالم تطورت ولت تحل مشكلتها من الطاقات البديلة...نطلب من دولتنا يعملو التجارب متاع غيرهم... في ألمانيا زرنا مدينة بعيدة 100 كلم على برلين 100 بالميا طاقة بديلة من الطاقات المتجددة الرياح والشمس والفضلات... أحنا ما عملنا شي، وأحنا البلديات أكبر مشكلة نعانيو فيها الطاقة، ثلث ميزانيتي كرئيس بلدية ندفع فيها في الضو، اللي انجم بالطاقات البديلة والمتجددة نصرف شوية فلوس في غضون 5 سنوات ما عادش ندفع حتى فرنك، المواطن كان نحبو نتطورو نعملولو محطات شمسية وماعادش يدفع الفلوس... المصيبة واللي يغيضك أنو الشمس اللي عنا 3 آلاف ساعة شمس في العام، وأحنا الأوائل في العالم في الشمس وماناش مستغلينو، الطاقة فوق روسنا وأحنا نتفرجو عليها، وهذا المؤسف والمؤلم وأنا نطلب اليوم كوادر الستاغ تأخذ المشعل وما يخليوهاش في يد ناس مش فاهمة حتى شي في مستقبل بلادنا يخمموا كان على حد ساقيه هاي ناس جاية بش تستكرش وتاخذ الفلوس.... الحكومة خذات القرار السياسي وإرادة الدولة موجودة، معرقلين من قبل جزء صغير اللي ما فاهمش مصلحة بلادو وين ماشية... الإرادة موجودة والفلوس موجودة وهاذوما 2000 ميغا من بريطانيا راهو معناها اللي نجموا نبداو في الإنجاز وراها 20 ألف موطن شغل وناس بش تخدم بصفة مباشرة وغير مباشرة... المشروع الوطني هاذ لازم يتشاركو فيه الناس الكل".