علق خليل الرقيق كرونيكور برنامج في 90 دقيقة على إي أف أم، اليوم الثلاثاء 13 جوان 2023، على تصريحات وزير الدفاع الإيطالي غويدو كروزيتّو حول تونس.

وقال الرقيق:" بصراحة تصريحات وزير الدفاع الإيطالي لفتت نظري واللي فيها تقريبا مسؤول إيطالي يحكي من زاوية الأمن القومي الإيطالي، فما خصوصية في الموضوع، يعني يحكي من زاوية الأمن القومي الإيطالي، والأمن الأوروبي بصفة عامة في القارة الإفريقية، يعني عندو حاجتين مركز عليهم فيهم بعد نظر، نحب نؤكد عليهم بش نفهمو مبعد شنوة اللي بش يصير في علاقة بين أوروبا وإفريقيا، الأولانية بالطبيعية قالها الكلمة بوضوح يعني إذا كان ما أنقذناش إفريقيا وما وقفناش مع تونس سنسلم إفريقيا إلى الصين وروسيا، يعني رجعنا توة لمدار التنافس الحقيقي حول طاقة القارة الإفريقية وخاماتها، حول المشاريع المفتوحة وإمكانية استغلال برشا ثروات في القارة الإفريقية، إذن أوروبا والحلف متاعهم، فاهمين جيدا أنو هناك خطة أخرى يمكن أن تحدث لو انسحبت أوروبا من خط الدعم وخرجت تونس من دائرة شراكتها التقليدية، اثنين قراءة جيدة جدا للديمغرافية الإفريقية، معنتها تنجم تقول قراءة عملها سوسيوسياسية، يقلك هاذي في غضون سنوات عندي قارة بش يوليو فيها زوز مليارات نسمة، وزوز مليارات نسمة من غير تنمية، مع الفقر ومع الاستغلال يساوي جحيم مفتوح أمام أوروبا لتدفقات الهجرة، هذا هو الحديث، وزير الدفاع الإيطالي آش يعمل إفريقيا هاذي ماهي إفريقيا، يقول تونس وإفريقيا، بالطبيعة موقفو مع تونس تحرير الأموال فورا وإلى غير ذلك، لأن تونس هي قاعدة العبور المتقدمة لكل الموجات الموجودة توة، قاعدة مكثفة متاع موجات الهجرة، هذا آش يقول، يقول أنو المسؤولين الإيطاليين تقريبا تحدثو بعمق وبدراسة شاملة على ضرورة استقرار تونس، كيما قلنا توة ولات الديمقراطية وحقوق الانسان في درجة ثانية في النقاش، ولكن أيضا يهمهم جدا أنها دولة مستقرة ولا تسلم إلى الغير في صورة عدم دعمها، قيس سعيد مش حسن موازين قواه، حسن موازين قوانا نحنا، اليوم أصبح عندنا في أوروبا، حتى الأذرع اللي كانت تشكل ربما واجهة متقدمة كيما هولندا ضدنا، أصبحت اليوم تحمل الملف التونسي برؤية مغايرة، تنحات الرؤية الكلاسيكية متاع أعمل هاذي ونحي البرلمان وغيرو"...