علق خليل الرقيق كرونيكور برنامج في 90 دقيقة على إي أف أم اليوم الأربعاء 28 ديسمبر 2022، على تصريحات رئيس الجمهورية التي جدد فيها التأكيد على عدم التفويت في المؤسسات العمومية.

وقال الرقيق:" الرئيس أمضى على قانون المالية العمومية اللي ما فيه حتى ربع حرف يدل على بيع أي ربع مؤسسة، بمعنى أحنا وقتلي حطينا القانون قدامنا لقينا حاجة اسمها الهيكلة ما لقيناش فما حتى مؤسسة للبيع، نقول علاش عاودها لأنو فعلا الحرب المبنية على رئيس الجمهورية في المربع الاجتماعي قايمة على زوز مرتكزات، المرتكز الأول هاك بش تنحي الدعم، المرتكز الثاني هاك بش تبيع المؤسسات العمومية، إذن هذا رد الكرة إلى ملعب الخصوم، اللي خارج يعمل في معركة في الشارع ويحشدلها ويحضرلها في الإضرابات على أساس فما بيع مؤسسات عمومية ما فما حتى مؤسسة معروضة للبيع، إذا اللي عندو برنامج آخر الآن يلزمو يخمم ربما في مقترحات لإعادة الهيكلة وفي مقترحات لتحسين مردودية شركات الأداء متاعها صفر في صفر في صفر وما ربحت الدولة في حتى شي، ولكن إذا عندكم حرب بعنوان بيع المؤسسات العمومية راهو المؤسسات العمومية ليست للبيع، تنجم تقلي انت كي العادة ويقولو هوما الرئيس يقول شي والحكومة تعمل شي نقلك الحكومة عملت قانون مالية ما فيه بيع حتى ربع مؤسسة عمومية، نقعدوش نعاودو فيها العام 12 هاذيا، بمعنى اللي بنى الحرب متاعو مع رئيس الجمهورية على المؤسسات العمومية يسحب السلاج هذاكا ويدبر سلاح جديد"...