علق خليل الرقيق كرونيكور برنامج في 90 دقيقة على إي أف أم اليوم الأربعاء 23 مارس 2022، على الإضرابات المتزامنة التي تشهدها البلاد، مشددا على أن الحكومة عاجزة اليوم على التنفيذ أو التفاوض في المسائل ذات الانعكاسات المالية.

وقال الرقيق:" هذاكا علاش جاء المنشور 20 هو غير محبذ ولكن عملو ستوب قالوا يا قطاعات ما تعملو حتى تفاوض في مسائل ذات انعكاس مالي إلا ما ترجعو للحكومة لأنو الحكومة ما عندهاش فلوس.. اليوم المصيبة اللي أحنا فيها الاتفاقيات الممضاة غير المنفذة شنية، هي أن السلطة الحالية تجني في ثمن سياسة إطفاء الحرائق اللي عملتها حكومات المشيشي والشاهد وغيرو يصححلك نزيدك كذا من غير وجود مخصصات مالية فعلية على ذمة وزارة المالية بش تخلص العباد.. يلزم اليوم ناقفوا على الواقع، صحيح الإضراب حق وفعل نقابي مشروع، ولكن إذا كان نقراو الإضرابات في الزمن، وقتلي عندنا ضرورة بش نخرجو من أزمة وونحسنو صورتنا كيفاش نعملوها، أنا كعامل وكأجير تونسي نعرف اللي البلاد هاذي بش نطلب اللي نحب وينجم يقلي الله يبارك، ولكن توة ما انجم نتحصل على حتى شي لأني أنا فاهم والطبوبي فاهم وقيس سعيد فاهم ونجلاء بودن فاهمة اللي أحنا نحكيو الزوز على كاسة فارغة، معناها فالس يحكي مع فالس يحب يأخذ من عندو فلوس، ما تجيش يلزمنا مدة نحطو ساقينا عالقاعة نفهموا ونتفاهموا ونتفقوا على طريقة بش نجيبو فيها فلوس للبلاد يلزمنا الكل مع بعضنا".