اعتبر خليل الرقيق كرونيكور برنامج في 90 دقيقة على إي أف أم، اليوم الخميس 19 جانفي 2023، أن قيس سعيد ساهم دبلوماسيا في إيصال الفكرة والموقف التونسي إلى صندوق النقد الدولي، حول اتفاق القرض.

وقال الرقيق:"نعتبر أنو الجدل اللي عملو رئيس الجمهورية والموقف المختلف اللي خلاه في وسط الموقف التونسي، يبدو أنو بدا يحقق في أهدافو على خاطر في مشية اللوبيينغ متاع دافوس وقتلي تكلمت كريستالينا جورجينا في وسط كلامها فما جملة مهمة جدا، متاع تحيين للموقف.. أنو علاقتنا بالطرف التونسي بش تراعي الجانب الاجتماعي للدولة، يعني عندنا خصوصيات تخلي التطبيق الحرفي للشروط يضر بالفلسفة كاملة متاع القرض اللي هي إنقاذ المالية معنتها بش نجي ننقذ المالية متاعي ما انجمش نعملها على حساب الخدمات الأساسية للمواطن... أنا نعتقد أنو قيس سعيد ساهم دبلوماسيا بضغط سياسي معين بالشوية بالشوية عبر قنوات مختلفة يتكلم، وصلت الفكرة، أنو صندوق النقد الدولي على الأقل توة فما مكاشفة يعرف اللي الطرف التونسي لن يدخل في الاشتراطات بحذافيرها خاصة في اللي تمس معيش المواطن وموادو الأساسية، وربما مؤسساتو العمومية وغيرو، ثم الصورة واضحة ويبدو أيضا أنو صندوق النقد الدولي من خلال قراءاتو لتباطؤ الاقتصاد العالمي ولوضع الدول الفقيرة والدول العربية، يخليه هذا أيضا ينجم هو قراءتو الاقتصادية وشروطو تتبدل وفق حالة يعيش فيها عالم كامل، أعتقد اليوم أنو قاعدين نقدموا شيئا فشيئا إلى كسب هذا الرهان دون الخضوع المفرط للشروط"...