كشف أستاذ الاقتصاد بالجامعة التونسية رضا الشكندالي اليوم الخميس 1 جوان 2023، خلال مداخلة هاتفية مع برنامج في 90 دقيقة على إي أف أم، عن بعض التفاصيل الخاصة بلقاء رئيس الجمهورية قيس سعيد أمس الأربعاء بثلة من الأساتذة الجامعيين.

وقال الشكندالي:" لمدة 5 ساعات كاملة كان اللقاء مع رئيس الجمهورية، وهذا ليس بالأمر الهين بالنسبة لرئيس جمهورية له جدول أعمال ثقيل نوعا ما، وقعد معانا 5 ساعات كاملة وهذا يذكر فيشكر، لأنو أحنا كنا قبل كأهل اختصاص نتشكاو أنو قاعدين نتكلمو في الإعلام ولكن ما فماش آذان صاغية... في الحقيقة رئيس الجمهورية من خلال استماعو لينا نحنا يبحث في حلول جديدة ومبتكرة، حلول يمكن أن تهتم بمعيشة التونسي، لأنو أحنا تقريبا الخطاب الاقتصادي اللي كنا نسمعوه من الحكومات السابقة الكل وحتى الحكومة هاذي هي في الحقيقة خطاب التوازنات المالية، وهو خطاب موجه للخارج، ما سمعناش خطاب يتكلم على الأسعار العالية، ما سمعناش خطاب رسمي يتحدث على خلق الثروة على البطالة على التهميش على التوازنات الجهوية، لكن هو يقلك ماذابينا الخطاب يكون موجه للتوانسة مش للبرة، البرة يلزمنا نحنا نتجنبوا الحلول التي قدمت في السابق ولم تنفع الاقتصاد التونسي وفي الحقيقة، نفس الحلول ونفس المقاربات ستؤدي أكيد إلى نفس النتائج وجربنا أحنا كيفاش خذينا الحلول متاع صندوق النقد الدولي، الحل متاع الترفيع في نسبة الفائدة لمكافحة التضخم المالي ولم تؤتي بأي نتيجة بل بالعكس التضخم المالي زاد بصورة كبيرة وكبيرة جدا، هو قاعد يسمع في المقترحات منا ومنا وقاعد يشوف شنوة الحلول المبتكرة اللي هي من عقول التوانسة"...