اعتبرت القيادية في حزب آفاق تونس ريم محجوب اليوم الثلاثاء 14 جوان 2022، خلال حضورها في برنامج في 90 دقيقة على إي أف أم، أن مقاطعة الاستفتاء من قبل بعض الأطراف قد تكون موقفا سياسيا لكنها لن تترك أي أثر في التاريخ.

وأشارت محجوب إلى أن حزبها سيترك بصمة في التاريخ من خلال التصويت بلا على الاستفتاء، نظرا إلى أن المقاطعة لا يمكن أن تخدم سوى خيار نعم بالنسبة لقيس سعيد، لا سيما وأن القانون لا يحدد عتبة انتخابية لاعتبار الاستفتاء لاغ من عدمه حسب تعبيرها.
وقالت ضيفة البرنامج:" تنجم تكون المقاطعة موقف سياسي ولكن قلي شنوة الأثر اللي عندها غدوة في الواقع ما تذكرش حتى أثر في التاريخ، بالرغم اللي وقت تقول لا بش تمشي تعمل ديناميكية أول حاجة بش نعملو حملة بش نفسرو للناس، بش نمشيو نطرقو البيبان ونعملو اجتماعات عامة بش نفسروا علاش لا وبش نخلقو جدل في المجتمع، الناس اللي تحب تسمع ومهتمة بالشأن بش تسمعك، كيف انت تقاطع وما تمشيش وتقعد في دارك قاطع على روحك، هذا ما يخدم كان النعم متاع قيس سعيد، علاش خاطر أحنا القانون ما فيهمش عتبة يقلك إذا كان أقل من 15 في الميا من الناخبين يعتبر الاستفتاء لاغي، حتى كان يمشيو 5 في الميا يعتبر الاستفتاء قانوني وانت كيف ما تمشيش تنتخب غدوة ويمشيو جماعة النعم فقط شنوة بش يصيرلنا غدوة تخرج النتيجة 95 بالميا من الاستفتاء نعم، أحنا قلنا لا يلزمنا نخليو بصمة في التاريخ باللا متاعنا، أحنا نحبو نخليو أثر مادي باللا، خاطر نعتبرو المقاعد الشاغرة والمقاطعة ما تخدم كان النعم متاع قيس سعيد، وهو علاش كان نخممو علاش اليوم الهيئة خرجت وقالت راهو الناس اللي مقاطعين ينجموا يجيو يشاركو يقيدو رواحهم مقاطعين وينجموا يعملوا حملة انتخابية على خاطر يساعدهم قد ما يمشيوش ناس قد ما غدوة بش يظهر النسبة المئوية ... اليوم خرج المنصري وعمل تصريح أنو المقاطعين ينجمو يمشيو يقيدو رواجهم مقاطعين وهذا مش قانوني مش موجود في حتى بلاد، تي هو حتى القرار اللي خرجوه نهار 13 غير قانوني بالنسبة للقانون متاع الانتخابات متاعنا علاش على خاطر في الانتخابات الاستفتاء شكون عندو الحق يشارك فيه كان الأحزاب، الأشخاص اللي يجيبو 100 عبد والمنظمات والشبكات والتحالفات الناس الكل عندهم الحق ما فهمتش كيفاش بش يراقبوها وتوة المقاطعين ينجموا يشاركو معناها خوماضة شنوة بش يراقبو، ولكن أحنا اليوم على كل حال القرار متاعنا في آفاق تونس خذيناه وراو خذيناه مش بالساهل عنا نقاشات دامو أيام وأيام وأسابيع وخلطنا لهذا لأنو قلنا أحنا نحبو نخلقو ديناميكية حول النقاش هذا واثنين نحبو نخليو أثر مادي للتاريخ نهار آخر اللي أحنا شاركنا وقلنا لا للمشروع وللمسار ومش لنص الدستور"...