علق سفيان بن حميدة كرونيكور برنامج في 90 دقيقة على إي أف أم، اليوم الجمعة 31 مارس 2023، على قرار وزارة الفلاحة حول الماء الصالح للشراب.

وقال بن حميدة:" أكا العام ماو قاللنا سي راشد الغنوشي تحلو الماء يهبط الماء تبارك الله عليه هاو غوث فيها وتقص الماء... توة أحنا نعرفو اللي الوضعية المائية في تونس وضعية سيئة، فما إجهاد مائي كبير ربما حتى جفاف، لكن ماهيش وضعية مش منتظرة مفاجأة، لا خذات أعوام، في الأعوام هاذيكا أحنا أش عملنا، الدولة شنوة اللي قامت بيه بش تلوج على موارد مائية أخرى، في تحلية المياه شنوة اللي صار، وخاصة نبداو باللي عندنا الساعة، في الاستغلال الأمثل للموارد الموجودة، بالنسبة للصوناد مثلا، آش عملت خلال الأعوام هاذي، بش تحد من نسبة ضياع الموارد المائية... حسب المعلومات اللي عندي الموارد المهدورة تقدر بـ10 ولا 15 بالميا من الموارد المهدرة، القرار معقول وقتلي تخلي الوضعية توصل للدرجة هاذي من الصعوبة، في كل مرة فما مشكلة كبيرة في البلاد، تحميل المسؤولية ما يكونش للمسؤولين الفعليين وإنما للمواطنين، المواطن التونسي، يستهلك في حدود 120 لتر ماء للفرد، في أوروبا مثلا 150 لتر ماء، نحنا في المعايير المتعارف عليها، ما فماش إسراف كبير، فما تضييع ماء في بعض الأوقات والأماكن، لكن عموما ماناش مسرفين في الماء، الماء الضايع مش مسؤول عليه المواطن وهذا اللي ما خدمناش عليه، لكن المواطن هو اللي اليوم قاعد يخلص في الفاتورة، الشي الآخر أنو القرار متاع الوزارة جاء بش يقنن وضعية هي موجودة، لأنو عندهم عدة أسابيع بدات الصوناد تقص الماء على العباد بصفة دورية وسنسونا بهذاكا، مبعد جاء القرار، تقولش عليه لتسوية وضعية ماهوش قرار جديد... ما فماش ردة فعل لأنو المجتمع التونسي فد ومسح يديه من السلطة هاذي ولا، كل حاجة خايبة ينتظرها منهم"...