علق سفيان بن حميدة كرونيكور برنامج في 90 دقيقة على إي اف أم، اليوم الاثنين 2 جانفي 2023، على لقطة رئيس الجمهورية المتعلقة بالزيت النباتي.

وقال بن حميدة:" معناها أنا السؤال اللي في ذهني توة الرئيس عملها العملية، هو حب يعمل الفرجة هاذي وإلا نصحوه بيها، إذا نصحوه بيها، يلزم العباد الكل اللي نصحوه يطردهم، لأنو عطات أثر عكسي، راهو الزيت ماهوش موجود، وحتى كي يتوجد ما يتوجدش في دبابز نظاف بالشكل هذاكا، راهو مش هكاكا التوانسة يشريو في الزيت، راهو يا سيدي الرئيس ماعادش اسمو زيت الحاكم كي يبدى هكاكا، إذن المسرحية اللي عملوهالو وورطوه فيها لأني أنا نحب نقول ماهوش هو اللي جاتو الفكرة، ثم أنو راهو وراونا فيديو فيه مونتاج وكذا ومين دراك أنو العطار ما قالوش راهم جابولي اليوم الصباح 4 قاجوات وعندهم مدة ما جابوليش، إذن ورطوا الرئيس والعطار، الرئيس بش يبقى رئيس أما العطار بش يرجعوه تكركيرة مسكين... كي يبدى فما نقص في مواد أساسية ما يزيد حتى شي التوانسة أنك تظهر أنهم موجودين في عطار في المنيهلة، إما تعمل على أنو المواد هاذيكا تتوفر حقيقة وإلا راهو المشكل مش بش يتنحا وتعطي أثر عكسي"...