علق سفيان بن حميدة كرونيكور برنامج في 90 دقيقة على إي أف أم، اليوم الأربعاء 22 جوان 2022، على التسريب المنسوب للقاضي محمد كمون.

وقال بن حميدة:" في الظرف اللي تعيش فيه البلاد التشهير يبقا أحسن وأقوى سلاح في محاربة الفساد في أي قطاع، يجب التشهير وما تخافش من الثلب وإذا كان يظهر ثلب مبعد خلص خطية... التشهير سلاح فعال ضد الفساد، هل نحتاج إلى تسريب كيما هذا بش نعرفو اللي القضاء فاسد أنا بالنسبة ليا ماهوش حاجة جديدة، ما نعرفش التسريب هذا صحيح ولا مفبرك اللي نعرف اللي قضاة في بعضهم عملو تقارير ونشروها وأكدوا وجود فساد كبير ياسر ما نعرفوهش، في 2011 فما قاضي هو نفسو سلم روحو قال أنا راني قاضي فاسد والوحيد إلى حد الآن، فما قاضي واحد شريف اللي غلط وكانت عندو الشجاعة بش يعترف بغلطتو، الشي الآخر وهذا يقلق هو أنو القضاء فاسد معناها قضاء غير ناجز معناها ما يخدمش خدمتو ما يوفرش العدل للعباد وهذا يخلي أنو واحد كيما سي لزهر اللونغو اللي هو واحد من المورطين في قضية انستالينغو يغادر البلاد لا سو لا سوية وقتلي هو في حالة تفتيش كيفاش صارت، القضاء ما خدمش خدمتو ولنا يلزم نفتحو ملف واحد آخر هو علاقة الجهاز القضائي بالجهاز الأمني، لكن فما حاجات تقلق زادة من جهة أخرى هو أنو التسريبات هاذيا لو أنو القضاء متاعنا نظيف ماهو راهو هو تكفل بالموضوع قبل أي شي آخر وما نستحقوش لصفحات ما نعرفوش شكون وراها وكيفاش ممولة وشنية اهتماماتها وكذا بش تخرجلنا التسريبات هاذي".