علق سفيان بن حميدة كرونيكور برنامج في 90 دقيقة على إي أف أم، اليوم الأربعاء 1 فيفري 2023، على تصريح رئيس الجمهورية قيس سعيد حول فاجعة جرجيس ووجود ثقب في المركب.

وقال بن حميدة:" في عمليات الحرقة، أغلب الأوقات تصير في مراكب الصيانة متاعها خايبة ياسر، الشقوفات ميتة، أنك تلقى أنو فيها ثقب غير قابلة للإبحار ويمكيجوها بالريزين وكذا هذا شي عادي راهو، لأنو المهربين راهو مجرمين، فعلا مجرمين أنا إذا حاجة نتفق فيها مع الرئيس، أنو اللي صار مش غرق، عملية قتل، لأنو يعرف هازز عباد في شقف تاعب... العباد اللي حرقوا ما يعرفوش... على خاطر فما نوعين مالحرقة، فما اللي يخدم مع حراق ويعطيه ثقة لأنو خرج قبل عباد وما صارتش مشكلة، لكن الشقف هذاكا هو منع المرات السابقة مش لاباس عليه، وفما شكون اللي يحرقو هاذيا الحرقة الـ5 نجوم، الأهالي بيدهم يساهموا ويشريوا شقف جديد، إذن هاذوما مضمنين أولادهم لاباس، في قضية الحال أي انت رئيس تعرف اللي الشقف منقوب وكذا يقللنا عليه، كي عرفت انت قوللنا شكون اللي نقبوا نعملوش كويز وطني شكون نقب الشقف.. فيما يتعلق بحكاية الـ200 مليون اللي يحكي عليها رئيس الجمهورية، وأنا كنت سمعت تصريح لمسؤول في منتدى الحقوق الاقتصادية والاجتماعية يقول الـ200 مليون هاذوكم راهي تبرعات فردية تم استعمالها لتمويل البحارة اللي شاركت بقواربها في عمليات البحث وهذا استمر ممكن شهر كامل، بش يدخلو بش يشريو المازوط متاعهم... معناها عنا رواية أخرى اللي هي رواية مقنعة زادة"...