تطرق كرونيكارا برنامج في 90 دقيقة على إي أف أم، مختار الخلفاوي وسفيان بن حميدة اليوم الخميس 19 ماي 2022، إلى مدى أهمية وجبة "المقرونة" لدى التونسيين، حيث اعتبرها مختار الخلفاوي خطا أحمرا وأكد بن حميدة أن مسألة في غاية الأهمية.

وقد استعرض الخلفاوي تاريخ المقرونة في تونس وأنواعها وتطور نسق استهلاكها، قائلا:" في الثمانينات العايلات كانوا يحشمو بالمقرونة يقولو عيب، ياكلو في الكسكسي كانوا في النهار وفي الليل مرة بالحليب ومرة بالصوص، يقلك عيب ياكلو في المقرونة معناها ما في حالهمش... الآن تحولت الأمور صارت المقرونة الأسهل للتونسي، ورثناها على الطلاين في مرورهم لتونس وصرنا من أكثر الشعوب استهلاكا لها وإنتاج لها وتصنيع وجودة في الأسواق العالمية، بقا علاش اليوم نقولو ساهلة المقرونة، الحقيقة ومن تجربة حتى شخصية، الكوجينة ماعادش منوعة في تونس علاش أسباب الغلاء متاع الأسعار، وضعف وتراجع الألياف والحوايج المفيدة في الكوجينة، والناس تمشي إلى حاجة خفيفة المقرونة ساهلة، أسهل ما فما أول ما يتعلم الولد والبنت في دارهم المقرونة، المقرونة أنواع وأصناف مش 3 أكهو سيدي خويا، فما المقرونة الصحيحة اللي هي بالضان بالعلوش وفما شكون يعملها زادة بالحوت ولا بغلال البحر ولا بالدجاج، فما المقرونة الثانية هاذيا حمراء صحيحة بالصوص والبروتينات متاعها مش مكلفين، كيما اللحم المفروم ساهل ورخيص وتنجم تذر منو اللي كتب، وفما المقرونة الزعراء هي كذابة، أنواع الكذابة الكذب أنواع، فما كذابة كذابة وفما اللي تنجم تحط فيها حتى جبن طوابع، المهم تزينها... نختم بالنوع الأخراني على الأقل اللي عندي أنا في انتظار القايمة المفتوحة، فما مقرونة بيضاء زادة يحبوها خاصة الصغار بالفطر والصلصة البيضاء"...