علق طارق الكحلاوي كرونيكور برنامج في 90 دقيقة على إي أف أم، اليوم الأربعاء 24 أوت 2022، على بلاغ رئاسة الجمهورية بعد لقاء الرئيس قيس سعيد برئيسة الحكومة نجلاء بودن أمس الثلاثاء.

وقال الكحلاوي:" بلاغ الرئاسة البارح فيه أكثر من نقطة فيها تكرار، تكرار نقطة القضاء ونقطة الاحتكار والمضاربة، ونفس عناصر الخطاب، كأنو أول مرة يقولها، وكأنو الرئيس قاعد معانا هنا في البلاتوات متاع النقاش وعبر على رايو هذا شنوة يلزم يجرى ... ما هوش هو اللي يملك كل السلطة التنفيذية في تونس باهي، في علاقة بالقضاء فما جانب عندو بيه علاقة كسلطة تنفيذية نحنا توة العطلة القضائية ما فماش حركة عادية في المحاكم، زيد تأثير شهر ونص تقريبا متاع الإضراب فما تأجيل عديد القضايا، ما نعرفش شنوة مادام يحكي هكا فما حاجة فما قضية موضوع جاه، فما نقطة جاتو ما نعرفش الحقيقة ما عادش انجم نتبع بالقدا ساعات الرئيس الله أعلم شافش حاجة في الفايسبوك مالناس اللي يتبع فيها يخليه اللي معنتها يقلك أيا توة لازمني نطرح الحكاية هاذيا مع رئيسة الحكومة، في كل الحالات أهم حدث كان مالمفروض يركز عليه هو التحضيرات للقمة الإفريقية اليابانية الحدث اللي بش يخلي تونس على الركح الدولي... موضوع المضاربة والاحتكار لهنا عنا مشكل متاع ارتفاع أسعار واضح وتضخم نسب قاعدة تزيد، ماهيش تزيد 4 في الميا كل شهر لكن حتى الصفر فاصل 5 وواحد واثنين في الميا، خاصة في المواد اللي تستهلك يوميا عندها تأثير على حياة المواطن، واضح هو على هذاكا لكن أنو يحمل وزارة التجارة، شنوة معنتها مراقبي الأسعار انت تعرف جيدا اللي المشكلة معقدة توة مثلا ناخذو موضوع الدجاج مش مسألة مراقبي أسعار فقط، برا حدد من هنا لغدوة انت، كي يبدا عندك مشكل متاع انتاج، كي يبدا المنتجين الصغار والمتوسطين عندهم 3 و4 شهور دخلوا في حالة ضغط، ماللول بدا العلفة اللي يعطيو فيها مش متوفرة ومبعد يحكيو على علفة مضروبة والسخانة اللي جات وعدم قدرتهم على مجاراة المنافسة مع المنتجين الكبار الـ3 المعروفين.... ما تنجمش تمنع بقرار سياسي ارتفاع الأسعار يلزم الرئيس يجيب المتداخلين الكل مش يصدر تعليمات من بعيد لوزيرة التجارة عبر رئيسة الحكومة، يا خويا انت رئيس الدولة تجيب في اجتماع أمن قومي كان لزم ولا اجتماع مجلس وزاري مضيق في النهاية انت الرئيس الفعلي للدولة وتجيب المتداخلين الكل من القطاع العمومي من القطاع الخاص من وزارة التجارة من وزارة الفلاحة من كل شي، نحطو فوق الطاولة ونعملو نهارين يا خويا، نهارين وأنا اللي ما نفهمش أعطيوني شنوة المشكل ونحاولو كسلطة تنفيذية كيفاش نتدخلو، أما مش كل مرة نعمل تكرار ونعاود وكل جمعة جمعتين نعمل تعليمات لوزارة التجارة عبر رئيسة الحكومة".