علق طارق الكحلاوي كرونيكور برنامج في 90 دقيقة على إي أف أم، اليوم الثلاثاء 10 جانفي 2023، على مثول المحامي العياشي الهمامي أمام القضاء في القضية التي رفعتها ضده وزيرة العدل، بعد التصريحات الإعلامية التي أكد فيها أن ملفات القضاة المعفيين مفبركة وأنه تم التنكيل بهم.

وقال الكحلاوي:" اللي صار في علاقة بالعياشي ونجدد تضامني معاه في علاقة باللي صاير، يوريك هو أنو ما فماش عقل سياسي داخل السلطة، في وقت اللي المحامين صايرة تعبئة داخلهم في علاقة بموضوع الجباية وقانون المالية إلى آخره، يقع استفزازهم في علاقة بشخصية اللي عليها نوعا ما التفاف واسع، أنا اليوم شفت الناس ومختلف التصاور، حضر العميد الحالي والعمداء السابقين، على مستوى التيارات السياسية تعرف المشهد متاع المحامين تنجم تفهموا من خلال حضور الرموز السياسية، حضروا من أقصى اليسار إلى أقصى اليمين، تقريبا كل العايلات السياسية حضرت، علاش يعني في الآخر، تعمل حركة كيما هكة اللي تخلي في النهاية التفاف واسع ضدك، وياخذ بعد سياسي لأنو العياشي وجه سياسي بش تعمل عركة مع العياشي بش تعمل عركة سياسية مع العياشي، عركة سياسية مش من أجل افتكاك مكانك في السلطة بل في اتجاه تقييمك ومعارضتك من زاوية سياسية مش فقط موضوع الجباية، وهذا بش يزيد يقوي داخل المحامين وهيئة المحامين التوجه نحو المبادرة السياسية للإنقاذ، نحو أنو يكون يلعبو دور سياسي أكثر على مستوى مواجهة قيس سعيد، أنو يتوجدوا في كتلة معارضة سياسيا مش فقط كتلة متاع والله هانا في الوسط ونقيسو، النقطة الثانية هو موضوع القضاة ونقطة في نفس الأهمية، إلى حد الآن ما فماش حركة للقضاة، هذا راهو النقطة الرئيسية بش نفهمو المأزق اللي وضعت فيه وزيرة العدل قطاع القضاء برمته والمرفق العدلي برمته، أنها خدمت دوسي مضعضع، جاء قدام المحكمة الإدارية قالت في حيثيات الحكم راهو ما انجموش نعديوه وما انجموا كان نوقفوا التنفيذ وبالتالي نفرضوا عليكم ترجعوا القضاة هاذم يخدموا بالرغم اللي بعضهم ربما عليه شبهات واسعة لكن تخلط الحمص والزبيب إلى درجة أنو ما عادش ينجم يتعدى وفي اللخر شنوة صار تعطلت الحركة القضائية عنا مناصب ومواقع توة في القضاء فارغة مش قاعدة تخدم"..