علق طارق الكحلاوي كرونيكور برنامج في 90 دقيقة على إي أف أم، اليوم الاثنين 9 جانفي 2023، على قرار إعفاء والي صفاقس من مهامه.

وقال الكحلاوي:" المعتاد أنو المعني بالأمر سواء بش يتعين ولا بش يقع إعفاؤو، يقع إعلامو بشكل مسبق ويصير حديث، هاو علاش بش يقع الإعفاء هاو علاش ما انجموش نواصلو مع بعضنا، ثم يقع الإعلان على هذا، لكن قيس سعيد هو ديما النقيض متاع العادات والأعراف، يعني الحاجات اللي يعملهم عادة ما همش في الأعراف المعتادة وتعرف علاقتو صعيبة مع الناس، حتى كيف بش يعفي حد أنا نتصور يتجنب أنو يحكي مع الشخص هذاكا وزيد المشكل، خلفية الإعفاء أو التعبين، سواء في التعيين كان في النهاية مفاجئ ما كانش معروف عليه اللي هو كان قريب من قيس سعيد، كان يدعم فيه في فترة ما، كان ينتقد فيه في فترة ما، ثم ولا يدعم فيه بالفايسبوك في فترة ما، خلفية التعيين يبدو حتى ناس كانوا قراب من قيس سعيد، كانوا يقولو علنا اللي نحنا سنعمل على إعفائه لأنو يعتبروه، كاينو اخترق المشروع ومحيط قيس سعيد، ثم هنا أنا خلي نقول اللي جزء كبير من سياسة الرئيس ربما ولات تعتمد على التقارير الأمنية، ربما ولى مهم برشا فلان مع شكون قعد وحكى، وربما يكون قعد بين ظفرين مع الناس الخطأ، أو قابل الناس الخطأ، مالحاجات اللي تتقال اللي مسألة مقابلة متاع كورة، وهو تدخل لفائدة شخصية رياضية والشخصية هذيكا لا تحظى بقبول الرئيس، ثم فما مسألة متاع قريب جدا من بعض رجال الأعمال، حتى عندو قرابة معروفة بأحد رجال الأعمال المعروفين في صفاقس، وربما صايرة عركة داخل الوسط متاع الأعمال، ثم العركة الأخرى مع الاتحاد، يعني حل عديد الجبهات، تراكمت الملفات، ثم الملف الأكبر والأهم، اللي لتوة لا تحل، اللي هو ملف النفايات كثرت فيه التصريحات، وأسوأ حاجة ربما عملها والي صفاقس أنو ربما كان يتحدث كثيرا في الإعلام، وساعات تحدث أكثر من اللازم، مش لأنو أعلن حقائق بل ربما لأنو أساء ليه هو وحتى للمؤسسة اللي ينتميلها".