أكد طارق الكحلاوي كرونيكور برنامج في 90 دقيقة على إي أف أم، اليوم الاثنين 16 جانفي 2023، أن شعار ارحل قيس سعيد جمع جزء كبيرا من المعارضة يوم 14 جانفي.

وقال الكحلاوي:" فما طيف واسع من المعارضة على اختلاف أسباب معارضتهم لقيس سعيد، وربما هوما متناقضين في حد ذاتهم، يتفقوا في حاجة، اللي هو في علاقة بمعارضة تنجم تقول وصلت لحالة راديكالية وجذرية في علاقة بقيس سعيد... شعار ارحل قيس سعيد جمع جزء كبير من المعارضة، كان نخليو مالأحزاب البرلمانية حركة الشعب البرة، والوطد كان موجود في البرلمان، وتقريبا الناس الكل حاضرة، والنخبة السياسية الكلاسيكية معظمها شعارها رحيل قيس سعيد وفي الشارع... النقطة الثانية الرئيس ساهم في حالة متاع توتر واحتقان سياسي لدى النخبة ما كانتش ضرورية، في اللخر شنوة، باهي هبط هو قبل بنهار وبيهم وخونة وما نعرفش شنوة... إنك تقول كل من يعارضني خاين في اللخر قاعد تهز في الاحتقان، وفي اللخر الناس قالت شبيه هذا على عصابو، حتى مواطنين عاديين علاه هذا الكل؟... في التعامل الأمني الحواجز كانت شكلية... الخطة الأمنية عمليا اللي يشرف عليها وزير الداخلية ما كانتش منسجمة مع قرار المنع متاع والي تونس...في النهاية ملخص الوضعية هو أنو نحنا في وضعية شبه تسلطية، نصف تسلطية، الناس اللي تقول نحنا في وضعية تسلطية كلام غير دقيق، فما وضع متاع تخوين المعارضة، فما وضع متاع فرد فقط ماسك بكل السلط، فما وضع متاع قانون انتخابي يبعد الخصوم الحزبيين ويحصر المنافسة في أفراد قراب منك، فما هذا الكل، فما تكتب في دستور وحدك، لكن فما في نهاية الأمر هامش واسع للمعارضة، حتى الراديكالية اللي تنادي بإسقاط أنها تكون موجودة في الشارع، ولهنا الريسك فاش، أنو المعارضة هاذيكا متاع النخبة السياسية تلتحم بمعارضة اجتماعية وهذا مش حاصل، ولهنا النقطة الأخرى، أنا ما قعدتش نتبع 14 جانفي في النهار، أنا قعدت نتبع 14 جانفي في الليلة اللي قبلو والليلة اللي بعدو والليلة متاع البارح، الليل متاع 14 جانفي هو اللي يهمني في الأحياء الشعبية، اللي يهمني الشارع الاجتماعي اللي هو قادر حقيقة على تغيير موازين القوى، أنا اللي قلتو قبل أنو النخبة السياسية اللي هبطت في الشارع متاع البدلة والكرافات ماهيش هي قادرة توة تكون عندها مقبولية شعبية وتغير موازين القوى، اللي قادر هو الشارع الاجتماعي اللي ما كانش متحمس برشا، شوية ملاسين شوية حي الزهو القصرين، شوية شفت يظهرلي الكاف، لكن ما فماش الهبة متاع الشارع الاجتماعي سايي خرج لا ما فماش، ولهنا النقطة الأهم، أنا 14 جانفي بالنسبة ليا، ببعدو الرمزي أحد محطات ثورة في النهاية وانتفاضة اجتماعية خرجت في الشارع لأسباب اقتصادية واجتماعية، ما صارش تكرار كيما كانوا يحلمو بعض الناس، لكن في النهاية هذا رغم أنو وضع اقتصادي واجتماعي سيء"...