علق طارق الكحلاوي كرونيكور برنامج في 90 دقيقة على إي أف أم، اليوم الخميس 24 نوفمبر 2022، على الزيادة في سعر المحروقات وبيان وزارة الطاقة.

وقال الكحلاوي:" هبطت الساعة في الرائد الرسمي ثم هبطت الوزارة البلاغ... السياسة عبر الرائد الرسمي كي العادة أنو يقع إعلانات بعد نص الليل دون أي مقدمات ودون أي تفسير وأي توضيح، علاش مبعد يجي التوضيح بعد ما يطيح الفاس في الراس، الزيادات بالشكل هذا، البلاغ متاع وزارة الطاقة ملاحظة على جنب، مش لازم كالصيغة البيروقراطية الإدارية اللي تحطوها في المراسلات الكل يسرنا أن، ماهيش في بلاصتها، يسرنا أن نزيدكم 5 ولا 7 بالميا في المحروقات ما نتصورش اللي الناس فرحانين، شركة البترول عجيل، أي عرفت كالصيغة اللي تحطهم ديما في كل بلاصة... أخطا هذا نحنا المشكلة في علاقة بنقطة أساسية اللي هي في علاقة بالشفافية، بيان الوزارة أش يقول نظرا للزيادات اللي صايرة في السوق العالمية واللي تنجم توصل لـ100 دولار فاصل 5، الفترة القادمة هذاكا علاش قاعدين نزيدو، من الناحية النظرية إي معقول صحيح اللي فما زيادات في السوق العالمية، لكن الأصل شنوة ما كناش نعملو هكا قبل كانت تزيد السوق العالمية لكن قبل كان فما حاجة اسمها الدعم، قبل كان فما كي الوسادة كي تصير اللطخة متاع الزيادات في الأسعار في العالم يهبط التونسي على كي الوسادة تخففلوا الوضعية، يعني من المفروض الوزارة تقول ونظرا لأنو أحنا أيضا بدينا نتخلاو تدريجيا على سياسة الدعم من غير ما نوضحو في المقابل كيفاش بش نعملو توجيهه إلى مستحقيه كي الجملة السحرية متاع التوجيه إلى مستحقيه ووقتاش وكيفاش بش نعملوها رانا توة بش نزيدو كي الخمسة في الميا، نظرا لأنو التزمنا حقها تقوللنا الوزارة باسم الحكومة في اتفاق صندوق النقد الدولي المبدئي اللي تعمل في أكتوبر ونظرا اللي ماشين توة في أول ديسمبر بش تصير مصادقة ولأنو فما التزامات مشروطة قاللنا صندوق النقد الدولي مالصيف راكم ماذابيكم تبداو في الإصلاحات قبل تطبيق الاتفاقات فإنو هذاكا علاش رانا بش نزيدو علاش ما فماش الصراحة هاذيا يا رسول الله علاش ما يكونش بوضوح... والله كانت تتقال بوضوح وبصراحة.. الكذبة كيفاش ساعات كي ما تقولش جزء مالحقيقة وكتلة كبيرة من الحقيقة قد هكا تطفي عليها الضوء والفيل الذي في الغرفة، وتقول لا راهو ما فماش اتفاق صندوق النقد الدولي لا رانا ما ناش نعملو فيه على أساس هذا، وقتها الناس تقول علاش تستبله فينا، علاش ما نكونوش واضحين مع بعضنا رانا بش نقعدو نزيدو بشكل دوري على خاطر الاتفاق اللي عملوه ما فيهش مرة أكهو راهو مرات ومرات، وقلناها قبل ما يصير الاتفاق أنو أحد شروط الاتفاق هو اتفاق مع اتحاد الشغل على أنو الزيادة على مستوى الأجور أنو ما تفوتش 5 بالميا، اثنين على مستوى بداية رفع الدعم وخاصة في موضوع المحروقات والتزامات واضحة وأنو بش تصير من هنا لديسمبر زيادات أخرين...".