اعتبر طارق الكحلاوي كرونيكور برنامج في 90 دقيقة على إي أف أم، اليوم الخميس 11 أوت 2022، أن تجديد رئيس الجمهورية لدعوته بتوحيد النقابات الأمنية يأتي على خلفية الحادثة التي رافقت عرض مسرحية لطفي العبدلي في صفاقس.

وقال الكحلاوي:" أنا شفت وجهات نظر مختلفة فما شكون قال يساعدهم التوحيد فما شكون قال ما يساعدهمش، شوف بغض النظر عاللي صاير وعالخلفية أما هذا جاء بعد الحادثة متاع لطفي العبدلي أما أنا نعرف من قبل أنو قيس سعيد طرح الفكرة من قبل مش جديدة معناها، والحقيقة الوضع الطبيعي أنو يولي فما حد أدنى من النظام، بغض النظر قيس سعيد سلطة أخرى أي شخص في السلطة ماذابينا على مستوى الدولة خاصة في قطاع حساس كيما هو الأمن أنو يكون فما نظام، أنا المرة اللي فاتت كي حكينا عالموضوع قلنا فما ناس خرجت تحكي في الإعلام على نقابات في موضوع ولاو يتحدثو على الذوق العام في موضوع ولاو يحكيو على الذوق العام هوما معنيين بتنظيم الذوق العام، يعني وصل النفوذ أو صلاحيات نقابة منهم على الأقل أنها تحكيلنا على تنظيم الذوق العام في الوقت اللي القانون الداخلي متاع أمر تنظيم النقابات يقول بشكل واضح اللي ما يتحدثو كان في الأمور التي تخص مسائلهم النقابية المهنية مش المسائل الأخرى، إذن المركزة ينجمو بعضهم يراوها إشكال لكن في النهاية تنظيم القطاع النقابي هذا مع إقرار حقهم النقابي هذا أحد مكاسب الثورة أنو كل القطاعات طبعا يكون عندها الحق النقابي أمر طبيعي بخلاف المؤسسة العسكرية".