علق طارق الكحلاوي كرونيكور برنامج في 90 دقيقة على إي أف أم، اليوم الثلاثاء 15 نوفمبر 2022، غاضبا على خبر دعوة الصحفي نزار بهلول للتحقيق معه على معنى المرسوم 54، بعد نشره لمقال وصف فيه نجلاء بودن بالمرأة الطيبة وانتقد فيه أداءها الحكومي.

وقال الكحلاوي:" بالعكس الوصف في العنوان لطيف ع اللخر، إذا كان هذا بش يتعدا عليه نزار بهلول 10 سنين حبس فإنو يا خويا أعملولنا محتشد في رجيم معتوق خلينا الجماعة الكل نمشيو من توة نقصو تساكر... لا ماهو كيفاش تبدا العمليات هاذيا أضرب القطوسة تتسحا العروسة، كيفاش تتعمل أنو برة ركزلي على نزار بهلول تاوة الناس الكل.. لا ياسيدي خويا نزار تنجم تختلف معاه تتفق معاه، أما في هذايا ما انجمو كان نتفقوا معاه راهو، إنسان كتب مقال عبر على رايو وعطا رأي تحليلي في الموضوع ما تعديهوليش 10 سنين حبس لاباس، مقدس الأقداس سيادتك، يا مدام رانا قاعدين نسايسو عليك راهو، أيا تحب نقلك بالعربي رانا مازلنا نسايسو رانا مازلنا ناخذو بعين الاعتبار اللي انت بالحق أستاذة جامعية تي عندي برشا أصدقائي قراو عندها والله ساعات نقرا هذاكا بعين الاعتبار أنا، ونسايسو تولي تعديلي على خاطر الراجل كتب مقال ينتقد في الأداء متاعك يولي 10 سنين حبس لاباس وين توة انت أستاذة جامعية وعندك على الأقل الجانب الأكاديمي اللي تفهم فيه أهمية حرية الرأي، توة ماشية انت تفتح القمة الفرنكوفونية أصدقائك في القمة موافقينك إنو اللي يعمل فيك راي يتعدا 10 سنين حبس، ياخي راهو الفرنكوفونية مش واحد يعرف ينطق بالفرنساوية وأكهو راهو تي مالمفروض فما تشبع بالقيم متاعها الفرنكوفونية هاذي على اختلافي أنا معاها، أما على الأقل تشبعلنا ببعض القيم متاعها هالفرنكوفونية متاع حقوق الانسان والثورة الفرنسية وغيرو واحد يكتب فيك مقال نقدي 10 سنين حبس وين كوريا الشمالية؟، أنا يظهرلي تمشي مدام لقمة كوريا الشمالية أكثر من أنك تمشي تفتتح قمة الفرنكوفونية".