علق طارق الكحلاوي كرونيكور برنامج في 90 دقيقة على إي أف أم، اليوم الأربعاء 31 ماي 2023، على الأسماء التي يشملها البحث فيما يعرف بالقضية الجديدة للتآمر على أمن الدولة.

وقال الكحلاوي:" النيابة العمومية يبدو ستبقى صامتة كيما في قضية التآمر القديمة، الحاجة الجامعة بين الزوز ملفات هو نفس مكتب التحقيق، المكتب 36... الملف هذا ما عندوش عنوان، هو الانطلاق في بحث في علاقة بـ21 اسم، من الأسماء الموجودة نلقاو عدد من الأسماء مش بالترتيب، أسماء مفرقة مذكورين بشكل متواتر في الندوات الصحفية لهيئة الدفاع في ملف الشهيدين في علاقة بما يعرف بالجهاز السري لحركة النهضة... مثلا أحد الأسماء المذكورة، اللي هو مذكور الأول اللي كان قبل في المجموعة الأمنية متاع الثمانينات، عنا أيضا من العناصر الأخرى المذكورة هو مصطفى خذر الذي أصبح أشهر من نار على علم، عنا عناصر أخرى كانت تتبع حركة النهضة وعندها علاقة بالملف الأمني... عنا قيادات صف أول في حركة النهضة... اللي نفهموه كاينو متعلق أساسا بموضوع الجهاز السري، وين الغريب أو عدم الانسجام، هو وجود عناصر سياسية لا يمكن أن تكون منطقيا في الجهاز السري لحركة النهضة، أولا رئيس الحكومة يوسف الشاهد، صحيح يوسف الشاهد كان متحالف مع حركة النهضة على أساس سياسي، أما أنو يكون موجود في الملف السري لهنا بش يطرح أسئلة، نلقاو قيادات أمنية عينها يوسف الشاهد، أهمهم طبعا مدير عام الأمن الوطني ثم اللي بش يعينو قيس سعيد سفير في سلطنة عمان، وكان قريب من نادية عكاشة اللي هو ك.ق، عنصر جوهري في مرحلة معينة من 2015- 2016، إلى 2019-2020، عنا أسماء أمنية أخرى كانت موجودة في وقتو، كيف ف.ع، اللي هو كان مدير إدارة الشرطة العدلية، نلقاو قيادات أمنية سابقة وقت علي العريض، محرز الزواري مع هذا نلقاو نادية عكاشة اللي هي كانت مديرة الديوان، لهنا في علاقة برئيس بلدية سابق ريان الحمزاوي، معروف من عائلة تجمعية، والدو كان معروف كان شادد لجنة التنسيق، ما انجموش نتحدثو، هذا كي نقول عدم الانسجام هو لهنا فما كي اللخبطة... نادية عكاشة خوها قبل ما يتوفى تم الاعتداء عليه بالعنف من الشرطة البلدية في وقت حكومة المشيشي هي اتهمت وصفحات فايسبوك قريبة منها اتهمت ريان الحمزاوي وهو عمل فيديوات للرد عليها، وكانت عركة معروفة ومعلنة بيناتهم ما كانش سر، هاذي من الحاجات الغريبة الأخرى اللي فيها عدم انسجام...".