علق طارق الكحلاوي كرونيكور برنامج في 90 دقيقة على إي أف أم، اليوم الاثنين 30 ماي 2022، على قرار تحجير السفر على زعيم حركة النهضة راشد الغنوشي وعدد من قيادات الحزب في علاقة بما يعرف بملف الجهاز السري.

وقال الكحلاوي:" توة راشد الغنوشي يجي بعد نور الدين البحيري بعد قداش من اسم من حركة النهضة، معنتها تصير مقاربة شبه قضائية خاطر إقامة جبرية حاجة فلو، وشنوة قدمت في المقابل، وفي حالة الزوز أنور معروف والبحيري فما تحجير سفر إي عادي تجرا في اطار التحقيق في قضية معينة أما ما فماش تقدم في القضية هاذي بشكل كبير، يخلينا نقولو أيا تم تحديد اتهامات وإلا لا هل يتسمى مظنون فيه وإلا لا ما نتصورش مازلنا ما وصلناش لمرحلة الاتهامات وإلا لا، إذا مازلنا بعاد في المسار القضائي، إذا كان فما شكون يحب يوظفها سياسيا أي ينجم ولكن شكون يصدقو تنجم تقول اللي تحب ولكن شكون يصدقك؟، إذا كان تلقى شكون يصدقك إنو هاذيا تتسمة محاسبة أي تنجم... موضوع الجهاز السري بغض النظر عالسياقات السياسية وكل الموضوع يلزم يتحط تحت عينين القضاء أما المهم يكون فما حد أدنى من الاستقلالية في القضاء خاطر ما انجموش نعاودو تعرف حركة النهضة في بداية التسعينات بن علي عديها عالمحكمة العسكرية قضية كبيرة قضية التنظيم، لكن كل المنظمات الحقوقية الدولية وقتها قالت هاذيكا محاكمة غير عادلة وفي اللخر مبعد كي صارت الثورة وكذا، العفو التشريعي العام أقيم كونو المعطى الأساسي أنو تمت محاكمات غير عادلة، بما فيها التأثير متاع الناس اللي شدت الحبس 20 و15 سنة بسبب القضية هاذيكا متاع المحكمة العسكرية متاع بداية التسعينات، اذا زادة تنجم تضغط وتعمل قضاء غير مستقل وتدخل الناس توة للحبس أما في اللخر قاعد تعاود في إعادة خلق وضعية الضحية، مكش قاعد تنهي في المشكل، فما مشكل يقع التحقيق فيه، أنا سمعت اللي هيئة الدفاع في ملف الشهيدين عندهم ندوة صحفية نهار الأربعاء ما نعرفش فما معطيات جديدة وإلا لا وتوة نشوفو بش تكون مؤثرة وإلا لا، في كل الحالات القضية هاذيا قتلت توظيفا سياسيا ساعات تعرف كي تقتل حاجة تعمل وتعادوها وتعاودها وتعملها تنهيلها الجدوى متاعها والأهمية متاعها وحتى الناس اللي مهتمين بيها بش توخر تقلك فديت منها الحكاية هاذيا أعطينا اللي بيه الفايدة القفة والغلاء والمقدرة الشرائية في اللخر التوانسة بش يرجعو للحكاية هاذيكا وهذا اللي بش يكون مؤثر في مسار الاستفتاء والأجواء المحيطة بيه".