علق طارق الكحلاوي كرونيكور برنامج في 90 دقيقة على إي أف أم، اليوم الخميس 8 سبتمبر 2022، على حادثة وفاة الشاب محسن الزياني في الباساج.

وقال الكحلاوي:" أنا شفت في بعض الصفحات وبعض البلايص القريبة من الديوانة قاعد يتم توزيع الفصل 51 و52 و53 حول حماية أعوان الديوانة، وخاصة الفصل 54 المتعلق بالحالات التي يمكن فيها استعمال السلاح، ولهنا الحقيقة النقاش هذا، توة بش تمشي المسألة في النيابة وفي النقاش، ويظهرلي تم إيقاف 3 أعوان المعنيين بالموضوع الاحتفاظ بيهم،، أنا مشكلتي مش هذا، عنا زوز شبان توانسة واحد متوفي مالسبيبة خرج سمعت مالسبعة متاع الصباح عملولو تشريح، خرج مالعشرة مشا للقصرين يستناو فيه أهلو وذويه، عنا شاب في مقتبل العمر محسن الزياني قاعد يحاول يلقط في خبزة، وعنا شاب آخر ديواني حسب ما فهمت مازال مستجد حتى في الخدمة وتوة عملية جراحية دقيقة إلى غيره، مالمفروض هاذوما زوز ولاد توانسة عندهم الحق بش يعيشو في أمان ومافماش علاش نوصلو للوضعية هاذيا المسؤولين عالوضعية هاذيا في أماكن أخرى، وتكرشوا حتى أصبحو بلا رقبة، ما يخرجوش للشارع ما يجريوش سواء أباطرة التهريب والناس اللي في الإدارة اللي ممكن يكونوا متعاونين معاهم، والناس اللي في القوات الحاملة للسلاح اللي ممكن يكونوا متعاونين معاهم، اللي الكلهم هاذوما تكرشوا حتى أصبحوا بلا رقبة وراء البيروات وما يظهروش وما يجريوش في الكياس وماهمش معنيين بإنفاذ القانون... البيان رسمي متاع الديوانة اللي كنا نسمعو فيه تو هذا كلام، اللي كتبو ما يحشمش، شنوة إطلاق أعيرة نارية في الهواء وفي العجلات ومبعد نلقاوها في صدر الراجل، ياخي في العجلات هو تحت العجلة، تو هذا كلام تتمسخروا عالعباد، ياخي دم العباد شنوة هكاكا كاتبلي هانا خالطين وراه، تم التفطن إلى سيارة يعني منين نبداه البيان أنا، تم التفطن إلى سيارة في قداش من كرتوشة دخان مهربة، في الوقت اللي في شوارع في حوانت في أكشاك في دبوات، هاذوكم ما في بالهمش، فرقة الأبحاث الإرشاد متاع الديوانة لاباس يرضعوا في صوابعهم تي أي واحد متعدي في الشارع في باب دزيرة ينجم يراهم الكراتش، تي الكراتش يتراو من النقاط الحدودية اللي جايين من الجزائر ومن ليبيا حتاش لتونس، نتمسخروا على بعضنا، وين عايشين الناس هاذوما، يسخايب كي خرجوا بيان ما نيجمش يتقرا يسخايلونا بهايم... ماناش بهايم عندك، ما عادش تخرجولنا بيانات كيما هكة أسكتوا على الأقل انتظروا حتى تتقدم الأبحاث"...