علق طارق الكحلاوي كرونيكور برنامج في 90 دقيقة على إي أف أم اليوم الجمعة 25 مارس 2022، على خبر تعرض البنك المركزي التونسي إلى هجمة سيبرنية.

وقال الكحلاوي:" الموضوع يتجاوز مسألة الموقع، الموقع ما عندوش أهمية كبيرة، الأهم هو قاعدة المعلومات وخاصة إمكانية الولوج لمنظومة تحويل الأموال متاع البنك المركزي متاعنا.. يلزم نوضحو اللي في العالم هذا عندو مدة يصير وكل ما تدخل المنظومة البنكية في العالم للرقمنة كل ما زادت المخاطر متاع إمكانية التهديد والمحاولات متاع براكاج، عمليا عملية براكاج.. صندوق النقد الدولي في ربيع 2021 هبط تثرير على تزايد المخاطر، ووصلت مديرة صندوق النقد الدولي كريستين لاغارد في وقت مالأوقات قالت اللي الهجوم السيبرني هذا ينجم يطيح المنظومة المالية العالمية كي بش يصير، ونزيد نوضح انجم نقول اللي ربما تقنيي المعلوماتية متاعنا قامو بعمل جيد لأنو في بلايص أخرى لم يتم التفظن، وأشهر مثال في بنغلاديش في 2016 حاولوا يخرجوا مليار دولار من بنك بنغلاديش المركزي لولا تفطن بعض التقنيين وفي اللخر نجموا يخرجوا 100 مليون دولار ولتوة بنغلاديش ما استرجعوهاش".
وتابع كرونيكور برنامج في 90 دقيقة على إي أف:" فما عصابات منظمة في الموضوع هذا، وخاصة في أوروبا الشرقية وروسيا وأشهر وحدة تم القبض على قياداتها في 2018 في اسبانيا من قبل الشرطة الاسبانية.. هنا عنا خدمة كيف العصابات اللي تدخل ملثمة وبالسلاح لكن ملثمين بطرق أخرى، يبعثو رسائل إلكترونية متاع تصيد ويدخلو في قاعدة البيانات متاع البنك المركزي، وما يلعبوش في الصغير، يلعبو بالبنوك الكبيرة".
وأشار طارق الكحلاوي إلى أن صندوق النقد الدولي سبق له أن كشف بأن الدول المتقدمة ربما تملك منظومات دفاعية أقوى من غيرها، وأن الخطر يبقى قائما في الدول الأقل دخلا، نظرا إلى أنها تحاول الانخراط في الرقمنة دون أن تكون لديها منظومة دفاعية قوية.
وقال الكحلاوي:"إلى حد الآن يبدو أن المنظومة الدفاعية متاع البنك المركزي كانت قادرة على تحمل المخاطر، لكن يلزم نقول العالم الكل متخوف من الهجمات السيبرنية بعد الحرب الروسية الأوكرانية، البيت الأبيض أول أمس خرج بلاغ يقول فيه اللي الولايات المتحدة تتحضر الآن وخاصة منظومتها المالية لمخاطر هجمات قوية سيبرنية من روسيا ومعروفين الرواسة في علاقة بالجرائم الإلكترونية".