طالب طارق الكحلاوي كرونيكور برنامج في 90 دقيقة على إي أف أم، اليوم الخميس النيابة العمومية والجهات المعنية بتقديم توضيحات، حول ما راج من أنباء على وجود إخلالات إجرائية في علاقة بالإيقافات الأخيرة.

وقال الكحلاوي:" وزير الخارجية اختصاصو التصريح في مسارات قضائية أول مرة نعرفها هاذيا ماو لاباس؟ فاش قام؟، توة سمعت رياض آش قاللنا، قاللنا موضوع الاختطاف يحيل على ميليشيات لا يحيل على دولة، فما عركة متاع سياسة، المحامين هاذوما في النهاية أيضا هوما ناشطين سياسيين ويدافعو على مسارات سياسية، لكن في نفس الوقت لا يعني كل ما يقولوه غالط، اللي يهمنا نحنا هو المعطيات، انت آش قلت توة،؟ قلت انت تعتبر اللي صار الكل صار بأذون قضائية وكذا بناء على شنوة، رياض: بناء على معلومة... انت قلت معلومة حتى أنا انجم نقول عندي معلومة اللي هذا غالط ونقعدو للصباح، شكون ينجم يفصل بيناتنا، رياض: النيابة العمومية... طارق: النيابة العمومية انت قلت اللي هي ما يلزمهاش تطلع أصلا توة، انت بالنسبة ليك، مش حتى هي قالتلنا ما يلزمهاش تطلع، هي ما قالت حتى شي، انت تنصح فيها اللي ما يلزمهاش تطلع... علاش؟ .. رياض: أنا عطيت رايي... طارق: كاينك تبررلها إنها ما طلعتش علاش؟، خاطر قلت بش تدخلي في حيثيات الملف، وعلاش بش تدخلك في حيثيات الملف؟، ياي ما تجمش تهبط بلاغ ترد فيه على مسألة الخلل الإجرائي في بعض الإيقافات، ما تنجمش تخرج بيان، يلزم تعمل ندوة صحفية؟، وعملو قبل ندوات صحفية في شكل نقاط صحفية وما خذاوش أسئلة وما جاوبوا على حتى شي، وقالو اللي حاشتهم بيه ما غير ما يدخلو في الحاجات اللي ما يحبوش يدخلوها، مثال على ذلك الندوة اللي عملتها وزارة الداخلية وقتلي طرح موضوع الاغتيال، ما جاوبوا على حتى سؤال، يعني تنجم فما صيغ بش تجاوب تقول تعطي رايك انت كنيابة عمومية، تخرج بلاغ تقول لا هاوا آش عملنا، المرة اللي فاتت كي صار الموضوع متاع القضاء العسكري والإيقافات متاع المحامين، قلنا لهنا هاو قالت الهيئة الوطنية للمحامين شنوة صار، ننتظرو وكالة الدولة للقضاء العسكري، وقلنا ما دام ما فماش نفي من غادي إذا بش نعتمدوا الكلام اللي قالتو هيئة المحامين رغم اللي هو صحيح يدافع على منظوريهم، ياخي رد القضاء العسكري، قال أي راهو كذا، ياخي نقلنا قلنا هاوا الرأي، هذا قال هكا وهذا قال هكا، أنا قلت وقتها كاينها لغة صينية كي ندخلو في تحاليل الجوانب التقنية، أما هنا ما عندك شي، صمت مطلق، وكانوا ينجموا يتحدثو على مسائل عامة، هاللي قالو وزير الخارجية، علاش مش النيابة العمومية هي اللي تقولو وترد على الجانب القضائي وعلى الإخلالات القانونية، تعرف أحنا لهنا، جبنا أساتذة متاع قانون لا علاقة لهم بالسياسة، منهم الأستاذ يعقوب، جاو قالك إي راهو فما مؤشرات متاع خلل إجرائي حسب اللي قاعد يوصللنا من معطيات، خرج انت بيان وقول ما فماش".