قدم رئيس حزب آفاق تونس فاضل عبد الكافي اليوم الجمعة 23 ديسمبر 2022، خلال حضوره في برنامج في 90 دقيقة على إي أف أم، جملة من الحلول للخروج من الأزمة التي تعيشها البلاد حسب تعبيره.

وقال عبد الكافي:" اليوم المعارضة التونسية مشتتة من جهة جبهة الخلاص ومن جهة الدستوري الحر، وفما كذلك أحزاب كيما آفاق تونس وأحنا طارحين حلول، كي أنا خرجت مبعد الانتخابات وقلت إيقاف المسار وتركيز حكومة إنقاذ أو طوارئ اقتصادية، وانتخابات رئاسية سابقة لأوانها هذا حل، نطلبوا من قيس سعيد يطبق الحل بش نخرجوا من الأزمة اللي نحنا فيها، الفرق بينا وبين برشا ناس اللي أحنا ماناش قاعدين نحكيو اللي صار في الانتخابات هو الرجوع إلى 2014، مش هذا المطروح أحنا موقفنا كان واضح من 25 جويلية، ولكن من سبتمبر 2021، اللي شخص خذا بزمام الأمور ويحكم بطريقة انفرادية في كل شيء، المسار السياسي، الانتخابات، هيئة الانتخابات، وين بش نمشيوا قدمنا حل مسموع ينجم يتسمع وحقو يسمعو المعني بالأمر... كان الناس سمعونا في الاستفتاء وكنا الحزب الوحيد اللي مشينا في الاستفتاء وقلنا لا وتعرفوا آش صارلنا في الاستفتاء وكيفاش تصرفوا معانا السلط الجهوية والمركزية كآفاق تونس، رانا ممكن وقفنا المسار في 25 جويلية 2022، ورانا ما وصلناش للي وصلنالو اليوم، هذا أول شيء، ثاني شيء نطلبوا خارطة طريق من 3 نقاط، النقطة الأولى يلزم نوقفوا المهزلة اللي قاعدين عايشين فيها اليوم، خاطر تضييع وقت وجهد وفلوس على التوانسة، يعني أقل من 10 بالميا من التوانسة مشاو ينتخبوا شنوة معناها، ما نسمعوش الصدى هذا، هذا واقع صلب، وقرينا النتائج اللي التوانسة ما حبوش يمشيوا للانتخابات ماهمش داخلين في المسار هذا ماهمش فاهمين شنوة بش يصير، اليوم المجلس اللي بش ننتخبوه نعرفوا آش بش يصير فيه، عروشية، مجلس ما عندو حتى صلاحيات في التشريع، يعني رئيس الدولة في دستور 2022، ينجم يعمل قانون والبرلمان مسكر، يعني برشا أشياء حكينا فيهم، اليوم اللي قلناه في 25 جويلية 2022، على حكاية الاستفتاء وتوقيف المسار وقتها، مش نقعدوا نقاطعو في الاستفتاء رانا ما وصلناش للي أحنا وصلنالو اليوم، اليوم مرة أخرى هاني طارح حلول عملية توقف هالحكاية هاذيا خاطر مش بش توصل حتى شي، إي يخرج رئيس الدولة يقول سمعت الشعب التونسي، وفهمت إلى أقل من تونسي على 10 مشاو ينتخبوا في الانتخابات هاذيا، وبش نعاود نشوف ونعاود نعيط للناس ونحكي ونمشيوا في طريق آخر ما فيها حتى عجب يعني، أول حاجة يوقف اللي قاعد يصير، يركز حكومة شغلها الشاغل هي الأمور الاقتصادية والاجتماعية وعيشة التوانسة كل يوم ومستقلة على الرئيس خاطر رينا اليوم الحكومة هي حكومة رئيس الجمهورية، وإن شاء الله يلقى عبد يقبل بش يجي يشد رئيس حكومة، يعني الحالة الوحيدة اللي بش يقبل بيها عبد هو بش يجي بش يكون مستقل بش ينجم يصلح الأمور الاقتصادية والاجتماعية، وثالث حاجة ناخذو وقت بعض أشهر بش انظموا انتخابات رئاسية ومعقول ياسر الرئيس انتخب على دستور 2014، معقول ياسر كي تتعدى من جمهورية لجمهورية تعمل انتخابات رئاسية أخرى".