كشف عبد اللطيف حمودة رئيس مجمع انتاج الطاقة المتجددة في جامعة البلديات، اليوم الجمعة 10 جوان 2022، خلال حضوره في برنامج في 90 دقيقة على إي أف أم، العراقيل التي عطلت الانطلاق الفعلي لبرنامج انتاج الكهرباء من الطاقات المتجددة والمتمثلة أساسا في المخطط الشمسي المبرمج بين 2015 و2030.

وقال حمودة:" الاشكال شنوة قلنا لو خممنا مليح وعملنا طاقات متجددة كيما برمجنا من 2015 مخطط شمسي حتى ل2030 قلنا بش نعملو طاقات متجددة 30 بالميا توصل تقريب 3800 ميغا لحد الآن ما وصلناش حتى 3 بالميا تعطلنا برشا...التعطيل العركة السياسية الموجودة في بلادنا خلت البرنامج الطاقي ما يتطورش، مثلا أخيرا تعطا ما يسمى بضمان الدولة للشركات الكبرى اللي بش تعمل انجاز في الطاقة المتحددة، أخيرا تعطات وربي يستر ما تتقبلش...اذا واحد يحب يعملك استثمار بقيمة كبيرة ياسر ماديا لا بد بش يضمن حقو في الخلاص متاعو مبعد والاستقرار متاع الدولة في كل شي اذا يطلب الشي هذا بش يستثمر...الشي هذا والتعطيل خلا إنو ما بديناش في البرنامج هذا... تعطيل العقارات اللي الفلاحة مش عملية ساهلة بش تاخو الأرض، أكبر حاجة الطاقات الشمسية تتطلب استساع من الأرض، أحنا نقولو الأرض اللي ما تنتجش، وزارة الفلاحة هي اللي تعطيك ترخيص، وقبل عملو شكل كراء لمدة 20 سنة، توة بدولها قالك يلزمك تبدل الصبغة، وإذا تغير الصبغة تاخذلك برشا وقت"...