اعتبر الناشط السياسي والوزير الأسبق عماد الحمامي اليوم الخميس 27 جويلية 2023، خلال حضوره في برنامج في 90 دقيقة على إي أف أم، أن التحوير الحكومي أصبح أمرا ملحا، وقد تأخر أكثر مما يلزم.

وقدم الحمامي تقييما لأداء أكثر الوزارات نجاحا حسب تقديره الشخصي.
وفيما يلي بعض من تصريحات الحمامي:" إذا كان الأسلوب التشاركي بالطريقة متاع الهواية اللي سارت بيها تونس من 2011 حتى لـ25 جويلية 2021، يعني أنو لازم الـ11 مليون نتفاهمو على حاجة بش نقدمو، مش هذا الأسلوب التشاركي، الأسلوب التشاركي هو أنو يكون فما قيادة ويكون فما انسجام في سلسلة القيادة، والقيادة يكون عندها وجهة نظر اللي على أساسها خذات التكليف من الشعب التونسي ومن أوسع دائرة من الشعب التونسي، ومبعد تأخذ بعين الاعتبار التفاعلات ويكون تفاعلي التسيير متاعها ما يكونش متاع واحد مسكر وذنيه ويقدم إلى الأمام فقط، الطريقة اللي يخدم بيها رئيس الدولة وهو رأس السلطة التنفيذية، في انسجام مع حكومة هو اختارها وساهم مع رئيسة الحكومة في اختيار الفريق هذاكا، قاعدة تتفاعل مع الشعب التونسي وقتلي يعبر على التفاعلات متاعو، إما على شبكات التواصل الاجتماعي أو في منابر الإعلام... الأيام بينت اللي تصريح الوزيرة ذاك ما هوش منسجم مع الوجهة اللي مشات فيها تونس، أحنا اليوم 27 جويلية 2023، شفنا أنو تونس مشات في اتجاه فصل المسارات، بين مسار صندوق النقد الدولي وبين مسار التعاون مع شريكها الأساسي الاتحاد الأوروبي وخذات قرض ثنائي من السعودية وخذات قرض من مؤسسة مالية دولية، وتنحات حكاية صندوق النقد الدولي يا إما تتفاهم معاه وإلا ما تنجمش تقدم، ومن ناحية أخرى فرضت الرؤية متاعها اللي يتبناها رئيس الدولة على أنو ما ناش بش نرفعو الدعم، إذا اتضح اليوم أنو التصريح متاع الوزيرة هاذاكا هو بعيد ياسر على الواقع والسياسة متاع الدولة، ويلزم رئيس الدولة يأخذ قرار وقتلي عضو من الفريق التنفيذي الأساسي اللي هو الحكومة يقوم بتصريح مناقض للسياسة متاع البلاد... التحوير الحكومي لازم وهو تأخر أكثر مما يلزم في تقديري الشخصي، طبعا رئيس الدولة هو يقدر ويتحمل مسؤوليتو وأنا في تقديري أنو صبر على هذه الحكومة أكثر مما يلزم... رئيس الدولة هو اللي يختار رئيس الحكومة ويساهم معاه في اختيار الفريق، ورئيسة الحكومة من واجبها بش تقيم أداء حكومتها وهو كذلك يقيم الأداء ويتصرف... أنا نشوف في تحسن كبير في أداء وزارة الداخلية ماللي تسمى عليها كمال الفقي، وهي من الوزارات الناجحة مع وزارة الشؤون الاجتماعية والعدل والدفاع والخارجية، وفما أداء جيد جدا في وزارة التربية، هذا حكم شخصي حتى كمواطن وكمتابع"...