اعتبر المحامي والسياسي محمد عبو، اليوم الخميس 16 فيفري 2023، خلال حضوره في برنامج في 90 دقيقة على إي أف أم، أن رئيس الجمهورية قيس سعيد يقوم بمغالطة التونسيين في علاقة بسلسلة الإيقافات الأخيرة.

وقال عبو:" ...نقول للتوانسة راهو كثرتولها بعدم الإيمان بالقيم وهاذي مشكلة كبيرة ياسر ، أنا من أول الناس اللي طالبت بمحاكمة الفساد وقلت حتى الأيام الأولى بالنظر إلى تشعب الوضع وكونهم مسيطرين على الداخلية والقضاء وكذا وكذا ما فيها باس إجراءات استثنائية وإقامة جبرية في وقت معين، بش ما يصيرش ردود فعل من عندهم هوما يكسروا منظومة معينة اللي هي جاية على بضعة أشهر بش تحل ملفات وترجع لقواعدها سالمة خارج الفصل 80، إذن أنا في هذا راهو مانيش ضد المحاكمات، بعد عام ونص يتذكر اللي فما ناس عندهم قضايا هاذيا تطرح إشكال خاطر من المفروض عندك أمن وكل شي من الشهر اللولاني الثاني تحل الملفات هاذيا وتخلي القضاء يواصل على روحو... توة سامحني يقنع في التوانسة كونو قاعد يوقف في فاسدين نحب نعلم التوانسة راهو يغلط فيكم، راهو اللي وقفهم مش خاطر فاسدين، بالنسبة لسي وليد ما نعرفش قالو رشوة، هاذيكا توة يشوفو محاميه ما عنديش فكرة على المف، هاذيا حكاية التآمر على أمن الدولة كتبتلكم البارح في الفايسبوك أقراو النصوص، التوانسة راهو هالكينكم برشا، أنا توة جاي نسمع في إذاعة في الثنية، شطر المعلومات اللي يقولو فيها ناس يسمعو فيها التوانسة هي معلومات غالطة، تاريخ غالط معلومات قانونية غالطة، شنوة المشكلة في البلاد زادة، راهو الناس يحبو نخب تعطيهم معلومات خاطرها متفرغة، انتوما صحفيين متفرغين، أحنا سياسيين إلى حد كبير زادة متفرغين يفترض هاذاكا علاش يخلينا نعرفوا أكثر من غيرنا مش معناها خير منهم، هوما خير منا في اختصاصاتهم... التآمر على أمن الدولة هي جريمة موجودة في الفصل 68 من المجلة الجزائية... نحب نقنع التوانسة راهو يلعب بيكم، 68 و69، يقولو، زوز مالناس فأكثر يتفقوا ويقروا العزم على ارتكاب إحدى الجرائم الـ3 هي اعتداء على حياة رئيس الجمهورية، اعتداء بالضرب على رئيس الجمهورية، ولا ارتكاب جريمة الفصل 72 اللي هي الاعتداء المقصود به تبديل هيئة الدولة... الجريمة هاذيا ما تنجم تصير كان بالعنف، كي جاو قدام قاضي التحقيق قبل موضوع النواب كي اجتمعوا عن بعد، ما حبش يوقفهم تطرد من خدمتو، طردو قيس سعيد من خدمتو، هوكا بطال خاطر ما يجيش بالمنطق بش تطبق 72 على نواب اجتمعوا، 72 مجعول على اعتداء عنيف، موجود في مجلة نابليون متاع 1810 خذيناه أحنا عام 1913، المقصود بالنص الفرنسي هو عملية عنيفة، مش اجتماع وتلموا وقعدوا شربوا حليب وكلاو حوت وكذا راهو سخافات، تذكرني في ملف في الآداب هوكا فيلم مصراوي تفرجوا فيه، خذاو حوت مع بعضهم عملولهم ملف، شنوة حوت وقهوة وناس ولات تنكت عليك يا سي قيس"...