أكد نبيل حجي القيادي في حزب التيار الديمقراطي والنائب السابق في البرلمان المنحل اليوم الأربعاء 22 جوان 2022، خلال حضوره في برنامج في 90 دقيقة على إي أف أم، أن دستور 2014 لم يكن سيئا وفيه مشكل وحيد يتعلق بتوازن السلط.

وقال حجي:" مبروك عليه البلاد بلادو والدستور دستورو والشعب شعبو أحنا اش مدخلنا الراجل يعمل اللي يحب هو، هو قرر دينها شنوة أحنا اش مدخلنا أحنا الدين هذاكا يهمنا فيه قيمتو في الدولة التونسية ومبعد في الدستور هذا كان خرج دستور ووافقولو عليه كيف سيترجم اللي قالو هذا قوانين اش مدخلنا فيه أحنا، هاو أكثر من هكا اسيدي عمل دستور يعمل الكيف وموافقين عليه التوانسة الكل وجاب 6 ملاين نعم، فما ضمانة أنو بش يحترم الدستور هذا قيس سعيد علاش هو احترم الدستور اللي قبلو احترم الأمر 117 اللي خرجو هو، قيس سعيد يعمل اللي يحبو قيس سعيد النصوص الكل هاذوكم مزينين بيهم... ماهو قال الدين الإسلامي دين الأمة واللي يلزم نحطو في الدستور هو مقاصد الإسلام، من مقاصد الإسلام هي الأمانة والصدق، خليني نذكرو سي قيس سعيد أنو يوما ما حط يدو على المصحف الشريف وأقسم باحترام الدستور، خليني نذكرك اللي أعضاء هيئة الانتخابات اللي غدوة هوما بش يسيرولنا الاستفتاء انو يديروه ويراقبوه وينظموه، وقتلي عينهم قيس سعيد مشاو للقصر وحطو أيديهم عالمصحف وأقسمو على احترام الدستور أصلا هو تعيينهم مخالف للدستور ورغم ذلك أقسموا على احترام الدستور...اذا كان دخلنا في العبث النصوص تولي لا تعني شيئا، عنا اليوم الحاكم بأمره في مخو هو مرسل العناية الإلهية في مخ بعض المناصرين ليه هو امبراطور والناس في الحقيقة هاو اللي بيه الفايدة اكتب دساتير الدنيا الكل ما هو عمل استشارة ماهي جابت بعض الأرقام الاستشارة متاعو اللي شاركوا فيها 534 ألف، هاو الصحيح اللي يهم التوانسة ردوا رئاسي برلماني دين الدولة دين اللي تحب انت هذا مش بش يصلح واقع التوانسة، في الاستشارة سأل هو شنوة أهم المشاكل اللي تواجهها الأسرة الجواب اللي جاب 64 بالميا مشاكل مالية، التونسي اليوم يشهق ما يلحق، قال بش يكتبلو دستور وفيه جانب اقتصادي، في الأثناء حكومتو شنوة ماشية تحكي مع صندق النقد على حاجات بش تحسن واقع التونسي تجميد الأجور في التضخم هذا اللي كل شهر يزيد، بش يحسن واقع التونسي دستورو، رفع الدعم سيحسن واقع التونسي سيسعدون... قداش فيه من فصل الباب الأول من الدستور، معناها تهز الفصل 9 تمشي للصيدلية تأخذ الأنسولين بالباب هذا، اكتب اللي تحب، الدستور اللي كتبناه ماهوش خايب بالكل هزو لدولة محترمة تاو يعيشو فل، فيه مشكلة وحيدة في توازن السلط، البرلمان يلزم عندو سلطة تنجم تحلو ومنطقيا تكون رئيس الجمهورية تتبدل هاذي تاو الناس الكل تنضبط ونعملو محكمة دستورية تاو نمشيو أمورنا باهية، إذن النصوص كان فما طبقة سياسية لا تحترمها وتتغول عليها وتعبث بها وللأسف نلقاو من يهلل لذلك من الشعب العادي نفهم أنو مل، لكن من النخب وتلقا واحد اسمو صادق بلعيد في خريف العمر يجي يعمل في روحو العملة هاذي وواحد اسمو أمين محفوظ مش فاهم اللي قاعد يكور بيه وواحد اسمو بودربالة مش فاهم شكون كلفو بالموضوع هذا ونبهت صدقا البارح سمعتو في وسيلة اعلام أخرى أنا أشفق على المحامين كيفاش انتخبوه الراجل، هاذم اللي يكتبولنا في الدستور ونعاود نقول مش هاذي مشكلة تونس انت غدوة اش بش تعمل في قروضاتك، انت نسبة الفايدة المديرية اللي طلعت اللي عندو قرض كان بش يرجع 300 في الشهر ولي يرجع في 350 دستورك شنوة بش يعملو، من طالت بطالتهم اللي انت ما حبتش تعديه القانون اللي يعانيو دستورك شنوة بش يعمللهم الأساتذة والمعلمين النواب اللي 8 شهر يخدموا ولتوة ما خلصوش دستورك وبابك الأول والثاني والعاشر آش بش يعمللهم، حاشتنا بمن يضع سياسات وينجزها ما حاشتناش بشكون يكتب نصوص وما حاشتناش بمدب حاشتنا بسياسي بمسير برئيس،  وبرئيس حكومة بوزراء بمديرين عامين حاشتنا بفكر ببرمجة بتخطيط وحاشتنا زادة ببرشا شفافية، وسائل الاعلام الكل تاو تراو عادي اللي قريتوه في الجامعة وأخلاقيات المهنة تحكيو على حاجة غير موجودة يعني لدرجة الفراغ ما فما كان قيس سعيد وما فما شي آخر في البلاد هاذي حتى شي"...