عبر صابر خليفة في أول حوار إذاعي له بعد اعتزال كرة القدم رسميا، خلال مداخلة هاتفية مع برنامج سبور ماكس على إي أف أم، اليوم السبت 1 جويلية 2023، عن سعادته وفخره الكبيرين بالتكريم والحفاوة الكبيرين اللذين لقيهما من مسؤولي وجماهير النادي الإفريقي أمس الجمعة بملعب حمادي العقربي برادس.

وقال خليفة:"نهار متاع أمس ما يتنساش، ومش بش يتنسى، صارتلي حاجة كبيرة في حياتي، وحاجة بش تقعدلي للتاريخ، بش تقعد حاجة باهية شرفتني، وبش تقعد تاريخ وفخر لي قدام صغاري اللي كانوا حاضرين معايا البارح، اللي صار البارح مش بش يتنسى… الحمد لله الواحد ماللي خرجت من بلادي قابس من عمر 16 سنة ليومنا هذا ما بدلني حتى شي، لا بدتلتني فلوس لا شهرة لا شي قعدت كيما أنا، وهذاكا هو الميساج اللي نحب نوصلو لأولادي ولصغاري وللناس الكل، ديما الواحد يقعد كيما هو حتى شي ما يبدلو، كيما قلت انت ما عنديش مزية لجمعيتي، ما عندي حتى مزية وبالعكس تمنيت انجم نعطي أكثر من هكاكا لكن الحمد لله هذاكا اللي كاتب والواحد اللي يعمل فيه مش مزية، هذاكا الكل مالمحبة وخارج مالقلب، والحمد لله وهذا شنوة ربحت أنا اليوم مالكورة، الكورة ومشات على روحها، أنا اللي ربحتو اليوم مالكورة اللي هي محبة العباد، هاذيكا أهم حاجة، أنا كي ندور في الشارع وإلا نمشي لأي بلاصة، نشوف العباد كيفاش فرحانة بيا وكيفاش تقدر فيا، الحمد لله بالنسبة لي أنا هاذيكا أهم حاجة وهذاكا أهم إنجاز بالنسبة لي، توفى الكورة ويوفى كل شي والواحد يقعد فعلو والحمد لله يا ربي نفتخر أنا كي نشوف حاجة كيما هكة حتى قدام عايلتي حاجة كبيرة بالنسبة لي أنا"…