وأوضح ضياء أنه اكتشف صدور حكم ضده بالصدفة، حيث أن آمر مطار تونس قرطاج الدولي أعمله بصدور الحكم ضده عندما كان ضمن الوفد الصحفي الذي رافق رئيس الحكومة هشام المشيشي في زيارته الأخيرة إلى ليبيا.

وفيما يلي تدوينة الصحفي ضياء الدين الكريفي كاملة:

اليوم نلقى روحي محكوم عليا 8 شهور حبس 
الموضوع حكيت عليه في الراديو  ان شاء الله نلقى الحلقة.
 في فيفري  2019  صارلي براكاج  في سيدي حسين. ( رومبواون بن دحة تحت القنطرة بالضبط).
من عند  زوز باعة لاكسيسوارات السيارات وسرقولي التليفون. 
لكن وقتها رجعت تليفوني  (بعد عركة   ضرب ومضروب وطريحة  كبيرة من ألطاف  الله خرجت لاباس وماتمش استعمال الحديد.)
وخلطت على السيد الي سرقني  ورجعت  التليفون .
الحادث هذا كان بشهادة مئات المواطنين شهود عيان خاصة عمال الطريق العام.
  كنت وحدي نجري ونتضرب ونضرب قدامهم  وحتى حد  ماتدخل حتى باش يحز  كنت وحدي قدام اولاد  حومتو.
بعد مافكيت التليفون  وطلعت لكرهبتي  اتصلت  بقاعة العمليات  المركزية... عرفتهم  بصفتي الصحفية  الطريق هذا متعودين بيه  بالباركاجات  خاصة  للاشقاء الجزائريين يروحو من نفس الطريق.
 وجاوني زوز دوريات امنية.
 ورجعنا  جبناه السيد الي براكاني  خرجتو  من تركينة في قهوة على بعد  3 كلم من مكان الحادث  الزهروني بعد أن استدرجه  والده بالهاتف.
تم اعلام النيابة العمومية لإتمام الاجراءات .
عشيتها العايلة الكل جات تطلب في السماح واكتشفت بعد أن له شقيق  كان عون امن وامه على فراش الموت  و الاب  رجل بسيط متواضع  وسخفني.
المفيد  سامحته  رغم انه اعوان الامن ورئيس المركز وبعض الاطارات الامنية في الداخلية   لاموني  وطلبو مني نواصل القضية.
لكن سامحت خاتر دموع  الاب ماحملتهاش والام متقدمة في السن  وعندها سرطان على مايبدو.
ورغم هذا النيابة العمومية  أتمت اجراءات الايقاف وتوقف السيد  في بوشوشة .
النيابة العمومية ماسمحتش وسلموني تسخير  طبي باش نمشي نعدي  على الأضرار البدنية.
(كنت نجم ناخذ شهادة طيية كيف مانحب انا ونضبرلها  كونجي).
(لكن من غدوة بعد فقرة المهمة في ماتينال شمس اف ام الي حكيت فيها على البراكاج الي صارلي بالامس).
 مشيت خرجت شهادة طبية في سبيطار  الرابطة  تثبت  سلامتي البدنية  رغم  الاوجاع الي كانت على مستوى ساقي " المفصوعة ".
طلعت سلمتها  لمركز الامن وقلتلهم  سامحته  خاصة  امه  عندها سرطان متقدم جدا قريب تتوفى " الله يرحمها".
المفيد روح  الولد لدارهم  بعد  إيقافه  لاكثر من 24 ساعة. 
وانتهى الموضوع.
على مافهمت اليوم  من بعض اعوان  الامن زملاء خوه 
يبدو انو 
غاضتو  الحكاية كيفاش هوا عون امن ومانجمش يسلكها لخوه  والموضوع  وصل  للداخلية و خوه كلا طريحة من عند الاعوان الي وقفوه  نهار  البراكاج الي عملهولي مع صاحبو.
مشى رفع  قضية  غيابي  وتعدات الجلسة  وتحكم عليا  انا 8 شهور  حبس ومافيبالش.  بتهمة العنف الشديد والاخلاق الحميدة.
الموضوع  اعلمني بيه  اول  امس  امر المطار كيف  جيت مسافر  الى  ليبيا.
رغم  اني سافرت في ديسمبر 2019 وتعديت لاباس. 
سعات القلب  الطيب و الرجلة الي تعلمتها من عند الحاج الوالد "بابا" مش باهية مع الناس الكل.
ستار الله
هذا الي عندي الكل قلتو  لكن مازلت مش عارف حاجة:
التهمة "عنف شديد"  اوكي  لكن الأخلاق الحميدة  مافهمتهاش.
الموضوع حكيت عليه في الراديو  ان شاء الله نلقى  الحلقة