وقالت الحامدي:" علاش موجود مجلس الأمن هذا، موجود بش يتم التداول فيه في مواضيع أمنية كيما هكا بطريقة سرية وياخذ القرارات اللي تهم الأمن القومي بطريقة سرية، يا خويا شنوة أحنا حتى مجلس الأمن القومي ولينا نعملوله في فايسبوك، تي ماهو موضوع يهم مجلس الأمن القومي، لنفترض موجودة هالمؤامرة ولنفترض هذا الكل موجود، أستروا ما ستر ربي خوذوا القرارات اللازمة للشعب التونسي وطبقوها، والأمور الكل مريقلة علاش نعملو منها احنا فايسبوك وتولي الإعلام العالمي يحكي علينا وكل شي، ولهنا نحب نقول بش يوريك انت كي تبدا البلاد يتم تسييرها مش بالكفاءات وهاذيا صايرة من قبل، ربي يهديه منصف المرزوقي، هو اللي حل الباب نحا الفيزاوات متاع البلدان الإفريقية، وبدات الناس داخلة، هاذوما راهم مش داخلين بطرق غير شرعية، داخلين مالمطار هاذوما، مالمطار يهبط بتسكرة يدخل لتونس، تي هو فما توانسة، فما آلاف التوانسة على خاطر عندهم شيكات ما ينجموش يروحوا لتونس وهاذوما أختي بتسكرة يهبطلك في تونس ويسكن فيها، هذاكا علاش كي تجي انت رئيس جمهورية تعمل قرارات كيما القرار هذا اللي عملو منصف المرزوقي ;واللي بعد بـ3، 4 سنين فقنا توة بالنتائج الموجودة هاذيا، مالا علاش عاملين أحنا مركز دراسات استراتيجية تابع لرئاسة الجمهورية ماهو بش يعمل دراسة للقرارات ويجيبلك تقرير ويقلك راهو كي بش تنجي الفيزا على البلدان هاذيا هاو تقريبا شنوة بش يجيك وهاي التبعات وهاو كذا وهاو الإيجابي وهاو السلبي أحنا لا أختي نرقدو ونقوموا نعملوا قرارات، اللي هي ما نحجسبوهاش ما نسمعوش ما نخموش بالكفاءات نخدموا بالولاءات، وهاذيا راني قلتها أنا أعضاء حزب الجمهورية الثالثة وأنا نقولهالهم الناس الكل، ثقافة الولاءات يلزم تتنحى مالبلاد ، ولاءات شنوة راهو كان العبيد يطلبو منهم الولاءات، الولاء للمولى عز وجل، أولا وللوطن ثانيا"...