وأضاف العشي أنه لن يصوت بلا سوى في حالة واحدة، وهي عدم التنصيص بوضوح على مسألة الهوية العربية الإسلامية في الدستور الجديد.
وقال ضيف برنامج في 90 دقيقة:" أنا بالطبيعة بش نشارك في الاستفتاء لأني داعم لمسار 25 جويلية مالنهار الأول، ومن نهار اللي رئيس الجمهورية عمل خارطة الطريق، طبعا مساند للمسار هذا والاستفتاء بش نشارك فيه شخصيا، والاستفتاء منعرج تاريخي كبير ياسر لتونس لأنو هذاكا اللي بش ينقل تونس من مرحلة إلى مرحلة... أنا عندي ثقة في اللي خدمو مع العميد الصادق بلعيد واللجنة الكلها ورئيس الجمهورية أنهم بش يخرجو دستور جمهورية جديدة فقط عندي احتراز واحد واللي هو يبدو أنو بش نمشيو خصوصا في المسألة متاع الهوية، يعني التأكيد على الهوية العربية الإسلامية، شخصيا في أي فصل ما يهمنيش في التوظئة اذا كان تبدا واضحة مش تتحط في وسط كلام إنشائي، تبدا واضحة التأكيد على أنو تونس شعبها دينه الإسلام والعربية لغته والجمهورية نظامها، هاذيا يلزمها تتحط في أي فصل واضحة أنا بش نصوت بنعم، إذا كان ما تحطش الهوية العربية الإسلامية أنا بش نصوت بلا، لكن بش نشارك في الاستفتاء، وبالعكس أنا نقول حتى الناس اللي مقاطعة الاستفتاء أعتبرها موقف ضعف، لأنو جرت العادة في جميع أنحاء العالم اللي يقاطعو الاستفتاءات لأنهم ما عندهمش القدرة بش يحشدو الشارع من أجل وضع كلمة لا قبل كلمة نعم، كان هوما قادرين بش الشارع التونسي بش يكون معاهم يشاركو في الاستفتاء ويقولو لا وقتها هوما يدافعو على مسار ومنظومة ما قبل 25 جويلية، لكن بش يقاطعو الاستفتاء ما معنى المقاطعة؟".