وقال المليكي:" التوانسة يلزمهم يعرفو اللي الدولة التونسية اللي توجدت قبل 70 سنة فيها اتفاق تاريخي لا هو مكتوب في دستور ولا هو ممضى ولا موجود فيه نص، أش فيه الاتفاق هذا، فيه نص لإدارة الصراعات في تونس، الصراع السياسي في الدولة التونسية يحسم بشكل سلمي، معناها في تونس في تاريخ الدولة هاذي وإن شاء الله في مستقبلها لا ينجم واحد يهز ميليشيا ولا مجموعة ولا ينجم يمشي هو وجماعتو لقصر قرطاج وينحي رئيس الجمهورية التونسية و يقعد ويشد هو بلاصتو، هذا اتفاق تاريخي مش مكتوب أما الناس الكل ملزمة بيه، فما الصراع الاجتماعي في تونس هو صراع سلمي يديره الاتحاد العام التونسي للشغل، اللي ما يفهمش هذا ما يعرفش سياسة وتاريخ تونس ، الاتحاد موكول له دورو الرئيسي أنو الصراع الاجتماعي بين الشغالين والمؤجرين لا يتطور إلى صراع عنيف وما تتحملش فيه الأسلحة البيضاء ولا غيرها، هذا الدور التاريخي اللي الناس مش فاهمتو متاع الاتحاد العام التونسي للشغل، راهو هو الضمانة أن لا تتحول تونس إلى حلبة متاع صراع بين الشغالين والمؤجرين، ياخذو حقهم بايدهم وكل واحد يهد على معمل ويفك الفلوس ويدخلو لديار الناس هذا الدور التاريخي للاتحاد، الدور الثالث اللي هو إدارة الأمن التونسي موكول للجيش التونسي، والجيش التونسي مبني على عقيدة إنو لو كان فما خطر داهم على الأمن الخارجي ولا الداخلي لتونس الجيش لا يقف مع أحد إلا الشعب التونسي، هاذم التلاثة ثوابت تبنات عليهم الدولة التونسية ديما أي واحد حاول يخرج منها بورقيبة ولا بن علي ولا الباجي ولا أي رئيس، الكلهم ما نجموش يخرجو منو الإطار هذا، اليوم شنوة اللي موجود عنا، اليوم عنا اتحاد عام تونسي للشغل عندو برقية متاع إضراب عندها 3 شهر، الحكومة ما حبتش تتفاعل معاه، طلب أكثر من مرة أنو المنشور 20 رئيسة الحكومة تنحيه، رئيسة الحكومة تحب تتفاوض مع الصندوق وتحب تجيب معاها الاتحاد خرجتلو مرسوم ما نتفاوضش معاك، معناها يلزمك هبال أكثر من هكة بش تعيش فيها البلاد هاذي، معناها انت نهار كامل تطلب من الاتحاد الجلوس إلى طاولة المفاوضات وإعطائك الموافقة متاعو على صندوق النقد الدولي بش تمشيلو، في نفس الوقت تخرجلو منشور تقلو ما نتفاوضش معاك، معناها فما انفصام شخصية سياسي في البلاد هاذيا، الاتحاد قال انحيو المنشور هذا ندخلو في مفاوضات جدية نعملو مفاوضات على الزيادة في الأجور، اش معناها زيادة في الأجور، انت خسرتني في التضخم 10 في الميا في المقدرة الشرائية متاع المواطنين اللي كان ياخو في 500 ألف تنحيلو 50 دينار من جيبو من غير ما يفيق سرقتهملو التضخم، يهبط للسوق ما عادش ينجم يقضي إذا قتلك عوضلي الوضعية هاذي متاع الشغالين، اللي هوما تقريبا نحكيو على 5 ملاين مواطن تونسي بالعائلات متاعهم، عوضهملي هاذوما، ثالثا الاتفاقيات اللي بيناتنا الكل هات ماك ملزم بيهم انت كدولة هات انفذوهم ويدخلو حيز التنفيذ، ورابعا هات نحكيو على القوانين الأساسية متاع الوظيفة العمومية والقطاع العام، خنظفو الموضوع هذا، جاء هو الاتحاد طلب المطلب هذا، وعمل برقية إضراب، الحكومة وقتاش تحركت، تحركت البارح، والاتحاد يثبت مرة أخرى أنو هو الضمانة متاع سلمية الصراع الاجتماعي في تونس والموقف اللي خذاه الاتحاد في الذهاب إلى المفاوضات موقف تاريخي ومشرف جدا، الاتحاد لاهو بش يكبر راسو ولا بش يصعصع، الاتحاد ديما يبقا على طاولة المفاوضات شكون اللي عندو مشكل متاع مفاوضات، الرئيس يحكي في حكاية رئيسة الحكومة تحكي في حكاية وزير الشؤون الاجتماعية يحكي في حكاية وزير التشغيل يحكي في حكاية أنصار الرئيس يحكيو في حكاية جماعة يسبو في الاتحاد العام التونسي للشغل".