وقال الهمامي:" حزب العمال من النهار الأول قال هذا انقلاب ولكن في نفس الوقت قلنا ماناش مع العودة لما قبل 25 جويلية، نحن كنا معارضين للمنظومة اللي تزعمتها حركة النهضة وتحالفت فيها مع النداء ومع أحزاب أخرى لمدة 10 سنوات وعطات ذريعة لقيس سعيد بش يعمل الانقلاب متاعو وكذلك نحنا ضد الرجوع إلى ما قبل 14 جانفي 2011، إذن نحنا في خط مستقل يحب يرجع للأصول متاع الثورة التونسية شغل حرية كرامة وطنية، تتحقق وهذاكا علاش قلنا في حقيقة الأمر إذا كان نحنا ضد منظومة حركة النهضة ومنظومة العشرية اللي فاتت رانا ما نحبوش نبدلوها بمنظومة جديدة مستبدة وهانا نشوفو فيه قيس سعيد قاعد ياكل في مؤسسات الدولة طرف طرف وفي حريات الناس طرف طرف لين بش يوصل للأخر للاستفتاء، أحنا مشينا نهار السبت قدام هيئة الانتخابات لأنها هيئة منصبة ومسميها قيس سعيد، ماهو قال ماللول لاهي عليا ولا مستقلة، مش نشككو في نزاهتها هي بالنسبة لينا أداة لاهي نزيهة ولاهي عليا ولا هي مستقلة وأكثر من هكة نعتبروها بالوضوح التام الأداة اللي بش تزور إرادة الشعب التونسي، هذاكا علاش حطها قيس سعيد، وراهوا لقضاء هذاكا علاش زرب بيه ما حبش يستنا لـ15 جويلية تدخل المحاكم في العطلة، مشينا بش نحتجو وخذينا رخصة استعملو معانا الغاز المشل للأعصاب في وجوهنا اللي يستعملوه الباندية في البراكاجات....لكن هذا بالنسبة لينا مش بش يوقفنا على الاحتجاجات بش نعملو حملة كاملة ومتنوعة إعلامية وميدانية... ما خلاوناش نقربو لمقر الهيئة في الورقة وقفة احتجاجية أمام الهيئة وكي وصلنا غاديكا قالولنا لا ما تقربوش".