وقال بن سلامة:" مجلس الهيئة مخترق مالجيهتين من طرف الخوانجية حركة النهضة إلى آخره، خذاو حتى نداء تونس في فترات ما باي، ومخترق بحاجة أخرى أخطر اليوم في الظروف هاذيا لأنو توة شخصنا الموضوع وعرفنا برشا ناس، كنت نحكي عندي 10 سنوات نقلهم راهو الهيئة مسيطرين عليها حركة النهضة يقلك شنوة دليلك ؟، وأكبر دليل هي المحاصصة الحزبية واللي هوما عندهم الأغلبية في لجنة الفرز اللي ينجمو يعديو اللي يحبو، وبالصفقات يعديو ناس أخرين.. اليوم مخترق المجلس بحاجة أخطر ببرشا اللي هي انعدام الكفاءة وانعدام المسؤولية، راهو وقتلي تجي هيئة متاع انتخابات عملت انتخابات 2019 بالمشاكل متاعها وبالتشكيك اللي صار اللي ما وصلش لدرجة رفض نتائج الانتخابات وتنجم هذا يخلق مشاكل في برشا دول .. التشكيك كان في حلو حتى انتخابات 2014 أنا واحد مالناس شككت في نتائجها ما قلتش تزوير.. الانتخابات متاعنا متلاعب بها قبل انطلاق المسار الانتخابي، بالفلوس القاسدة بالفلوس في الشكاير بالتدخل الأجبني بالإعلام اللي ما عندوش ضوابط بالقضاء اللي ما ياخوش قرارات".
وتابع ضيف في 90 دقيقة:" محكمة المحاسبات أهلنت السنة انها أحالت قداش من قايمة على المحاكمة لليوم ما خذات حتى قرار بإسقاط قائمات ما فماش الكلو كذب طلع، بش تفهمو الخطورة متاع المسألة، راهو انتخابات 2014، الجرائم اللي تم ارتكابها سقطت بمرور الزمن.. مجلس الهيئة يتميز في غالبه بعدم الكفاءة وانعدام المسؤولية، لأنو ما حضر حتى شي من 2019 لليوم بش انجموا نعملو انتخابات، عنا إدارة قادرة بش تعمل انتخابات في أي لحظة في 45 يوم لكن انت بعد الانتقادات اللي صارت في انتخابات 2019 كيفاش ما تقدمش مخطط إصلاح للهيئة قعدو يتفرجوا"...