وقال الهمامي:" النقاط اللي طرحتهم البارح وزيرة المالية شنوة الفايدة اللي فيها، بالنسبة للمواطن والمواطنة العادية، فما ضبابية وكيما طرحو رؤساء التحرير أعطينا الوثيقة آش فيها... وزيرة المالية عطاتهم منهجية وتوجهات عامة أما اللي بيه الفايدة اللي عندو انعكاسات على حياة التوانسة، الوثيقة اللي حكات عليها إحدى المنظمات اللي بـ50 صفحة اللي وثيقة سرية اللي الناس الكل بما فيهم انتم الإعلاميين والاعلاميات تقولو راهو ما نعرفوش اش فيها بما فيها المنظمات الوطنية والأحزاب السياسية تقول ما نعرفوش آش فيها... نعرفو اللي هوما يحبو يرفعو الدعم ويجمدوا الأجور ويفوتوا في المؤسسات والمنشآت العمومية ونعرفو اللي هوما حبسوا الانتداب أي اعطيني هاذيكا اش حطيت فيها... الوثيقة التقنية، ياخي مش قلتو الشعب يريد، الشعب علمو بحاجة، مش قيس سعيد يحكي عالغرف المظلمة والكلهم ما يحبوش الغرف المظلمة، وأكثر من هكة علاش ما يجيوش بحذاكم لوسائل الإعلام، اجتمعت من بعيد أما قالت راني ما نحبش الحوارات الهابطة...خايفين بالحق مش الحكومة برك قيس سعيد زادة هوما ماشين لانتخابات مهزلة وخايفين لا يقولو للتوانسة الحقيقة آش فما في هالاتفاق هذايا، هذاكا علاش الاتفاق هذا بين قوسين، التوانسة بش يعرفو حقيقتو كان مع جانفي فيفري الجاي راهو، فما بداية رفع الدعم على المحروقات، أما مبعد الحكاية بش تولي مخطرة أكثر، هاو الأسئلة المطروحة اللي هوما ما يحبوش يجاوبو عليها، صندوق النقد الدولي قداش بش يعطي 1.9 مليار على 4 سنين و8 أقساط، كل قسط 6 شهر وكل 6 شهر فما مراجعة، شنوة بش يحلولك، بش يحلولك مشاكل هاذم، هاذم ماكينة الإنتاج المعطلة بش يحلوها، تي ماهو بش يمشو في دفع خلاص المديونية وربما في أجور، بش يمشيو في الاستثمار هاذم مش بش يمشيو، وحاجة أخرى مثلا ما يحبوش يجاوبو عليها، أعطيني السنة خاطر صندوق النقد شرط عليهم قالهم قبل ديسمبر ما نوافقلكم إلا ما تعطيوني الميزانية التكميلية متاع 2022 وتعطيوني المشروع متاع 2023، توة بالنسبة للسنة منين بش تجيبلهم 25 ألف مليار مليم، فيهم 18 مالبرة قرابة 6 مليار دولار، أكثر ببرشا، أكثر بـ3 مرات مالقرض، و7 آلاف مليار مليم مالداخل منين بش تجيبهم هاذوما، وحاجة أخرى، ماك تعرفي سيادتك اللي ما بين 2023 و2025 ظرف صعب ياسر في علاقة بدفع القروض القديمة بش تبدا تونس تدفعهم، شنوة تصورك لمستقبل تونس في الشي هذا، ولا ماشي وفرحانين تويكا هاو صندوق النقد الدولي بش يعطينا شوية وراهو هذاكا بش يحللنا الباب بش نمشيوا نتسولو قروض أخرى مش تجينا مالجهات الأخرى، أي هذا بش يحللنا المشاكل متاع تونس وبش يفرهد الاقتصاد؟".