وأشار العبيدي إلى أن مشروع مستشفى القيروان كان من بين المشاريع التي تم تقديمها في المنتدى وأن أمواله موجودة ولكن لا يمكن استغلالها.

وفيما يلي أهم تصريحات ضيف برنامج في 90 دقيقة:" صحيح صارت وعود كبيرة وصارت بعض الإنجاز، لكن الإنجاز ما كانش في مستوى الوعود، خاطر بعد المنتدى تبدلت حكومة كاملة وطارت وجات الحكومة الجديدة قالت ما كانتش حاجة باهية وكيما قاعد يجي عنا 10 سنين اللي يجي في عوض يبني عاللي عملو اللي قبلو يطيحو الكل ويهدو بش يعطي لروحو شرعية وبش يقول اللي قبلي كان غالط هذاكا علاش أنا جيت... ما كانتش وعود زائفة كانت حقيقة والناس حبيت تستثمر جاو ملوك ورؤساء دول هوما اللي عملو الوعود لكن نحنا ما كناش في مستوى المتابعة والتجسيم... المستشفى متاع القيروان جاء من المؤتمر هذاكا قلوسو موجودة وأحنا ما نجمنتاش نستعملوها خاطر نحنا ما عناش قدرة على التنفيذ ما فماش ناس في الميدان مالنظام السياسي للنظام الكل ما فماش التزام وعمل فريق في الحكومة يمكنك انك انت تقول هاو المشروع متاعي وتحدد خطواتك ويكون عندك رؤية واضحة... فلوس مرصودة ومشاريع ما تتعملش متأكدين منها، الممولين الكل في تونس نشوفوهم قداش راصدين لتونس وقداش جسمنا نلقاوها نسبة ضئيلة جدا هذا واقع علاش ما جسدناش على خاطر ما نعرفوش نعملو عملية مصادرة للأملاك بسرعة... المستشفى ماهو لازمو أرض، المستشفى ماهو لا زمو أرض اللي بش يجيك حط الفلوس على ذمتك يقلك أعطيني أرض بش نبدا نبني... الأرض هاذيكا مواطن قال لا مواطن يحب يعدي كياس ورئيس بلدية يقول منطقة خضراء ما فما حتى واحد يحسب ويحل الإشكاليات، وقضايا وشبهات فساد واتهامات بالفساد... الممول فلوسو محطوطة المشروع معروف ونحنا نتعاركو... هي مش مجرد وعود هي وعود قابلة للانجاز لكن فما فريقين الممول يقلك أنا ما نصبلكش الفلوس في ميزانيتك ونقلك برا أعمل وقت تحب السبيطار انت حضرلي الأرض وريقل أمورك وأعطيني شنوة اللي تحب تعملو وأنا نبدا بعطيك بالإنجاز كل ما تقدم شوط أنا نعطيك شوط، صرف الأموال يصير بالمراحل وقت انت تقدم، هذا ما عادش الممولين يصبولك الفلوس مباشرة ويطلب منك حد أدنى من الحوكمة يقلك وريني المسؤولين عالمشروع، ساعة ساعة احنا نوحلو في مشكلة ما بين زوز وزارات، وزارة الفلاحة تقول مثلا أنا المسؤول على المشروع وزارة التجهيز تقلك لا أنا المسؤول
شوف مثلا مشروع ميناء النفيضة اللي الناس الكل تحب تمولو الناس الكل تحب تدخل فيه شوف شنوة صار فيه"...