وقالت عبو:" قراءة المشاركة في الانتخابات هي هزيمة الساعة لقيس سعيد أما مش انتصار للمعارضة، هي هزيمة لتونس أكبر منها هزيمة لقيس، لأنو وقتلي تشوف الشعب التونسي استقال من الحياة السياسية، إعلان الاستقالة هذا مؤشر خطير جزء كبير يتحملوا قيس سعيد وجزء آخر يتحملو كيف كيف الناس اللي كانت تحكم قبل 25 جويلية، لأني أنا كيف نقول اليوم أنا ضد المسار اللي عملو قيس سعيد متاع التفرد بالحكم إلى آخره، هذا لا يعني العودة إلى ما قبل 25 جويلية، انت يلزم تكون منسجم مع نفسك اللي يخليك ترفض ما قبل 25 جويلية الهيمنة على مفاصل الدولة والقضاء والأمن وتعيينات الولاءات، نفس الممارسات تخليني نرفض ما بعد 25 جويلية، نفس الشي قاعد يتكرر، يعني سامحني أنا بش نجي مع قيس علاش، عاد قعدنا مع مشومك لا يجيك ما أشوم، عاد قعدت أنا مع الجماعة اللي كانوا فعلا يهيمنوا على القضاء ويرقدوا في الملفات ويستعملوا في القضاء كأداة لتصفية حساباتهم على مقاسهم وبطريقتهم وفعلا الإفلات من العقاب، والهيمنة على الإدارة والهيمنة على الأمن والتعيينات والولاة والمعتمدين إلى آخره، هذا الكل كان موجود، وهذا الكل رافضينو ونعتبروه أنو هذا سبب انهيار الدولة وهو بداية خرابها، الحكم اللي مش منبثق على قواعد وعلى الدستور وعلى مؤسساتها وإنما منبثق على أشخاص... قيس سعيد رئيس جمهورية باش، منين جاتو الصلوحيات، راو عنا رئيس اليوم ماخذ الشرعية من دستور 2014، والمشروعية من دستور 2022 راهو عمرها لا صارت في تاريخ العالم السياسي، راهو عنو رئيس جمهورية سامحني أعلن في 25 جويلية، دخول دستور 2022 حيز النفاذ وإنهاء دستور 2014، أحنا في دستور 2014، عنا رئيس جمهورية وقع انتخابه انتخابا عاما حرا مباشرا في إطار ديمقراطية وشفافية إلى آخره بأغلبية كبيرة وكبيرة جدا، انتخابو من أجل ممارسة صلوحيتين الدفاع والخارجية وأدى اليمين على هذا، انت جيت اليوم أنهيت الدستور اللي بمقتضاه انت خذيت المشروعية متاعك وجيت قلت دستور جديد، أوكي في الأحكام الانتقالية عندكش حاجة متاع تسليم مناصب، ما عندك شي، عندك في المقابل المجال التشريعي يقلك يبقى العمل بالمرسوم 117 في خصوص المجال التشريعي إلى حين انتخاب مجلس نواب جديد، إي والرئاسية شنوة عملت يا سيدي قيس سعيد ما نقولش رئيس جمهورية أنا، شنوة عملت برئيس الجمهورية حتى شي، أعطيني انت الأحكام الانتقالية برا أقراوها فيها 4 فصول 4 أحكام، معناها هذا سطو على صلاحيات السلطة التنفيذية بدون موجب وسند دستوري فهو سطر، هذا حكم القوي حكم العسكر وحكم الأمن، حكم المراسيم حكم السلطة التنفيذية بدون سند دستوري اسمو انقلاب وعقوبتو وخيمة جدا"...
وتابعت عبو:" كي تقلي قيس سعيد مش فاسد، بالكش عامل عليا مزية، وأنا ما نقولش لا فاسد ولا مش فاسد، ما دام ما عناش أحنا تقرير متاع محكمة المحاسبات على التصرف المالي متاع رئاسة الجمهورية اللي الميزانية متاعها تزادت بشكل كبير مضخم مادام ما عنديش تقرير متاع المحكمة الدستورية صارت ما انجمش نحكم على سوء التصرف ولا على الفساد ولا على حتى شي، لا نقول لا باهي ولا خايب، وحتى فرضا، وإن شاء الله نتوقع أنا بصراحة خاطر يا خيبة المسعى كان تطلع هاذيا فما منها، إي ومبعد وماذا بعد هذا، بالك عامل مزية على العباد، هانا الحمد لله دخلنا للسلطة عنا 10 سنين وخرجنا والحمد لله بالكش عاملة مزيا على العباد أنا بش نقعد هكا.. حسب رايي المتواضع، شنوة اللي خلا يصير 25 جويلية ويصير إعلام على الفصل 80 وتلقى غالبية الشعب مع هذا الإجراء، علاش؟، على خاطر الناس كان متعطشة لحلول متاع تقويم الحكم، بمعنى إصلاح إدارة الحكم اللي كانت رديئة، إذن كنا مستحقين لرجة تصلح الإدارة السيئة وترجع حسن سير دواليب الدولة، اليوم مازلنا مستحقين لهذا، تنجم تعمل انتخابات مبكرة رئاسية تشريعية، ينجم يبعد قيس ويتنحى ولا يتخلى ولا يستقيل ولا اللي هو وترجع تعملولنا هذا الكلو إي ومبعد وين ماشين بش نرجعو لنفس إدارة الحكم الرديئة؟... الانتخابات يلزمها تكون لأنها هي الأساس متاع كل سلطة ديمقراطية، الانتخابات متاع قيس مش انتخابات، هي مهزلة في تاريخ العالم مش تاريخ تونس، ولا صارت في حتى دولة في حتى تاريخ وفي حتى عصر من بداية مفهوم الدولة الحديثة والانتخابات، ما صارتش المهزلة متاع انتخابات قيس سعيد، نقول لازم فما انتخابات، أما أنا نقول هل الانتخابات وحدها كفيلة بش تخلينا نقولو تونس غدوة خير بش نأمن على حكم بلاد غدوة، بش نأمن على أمنها على تقدمها وتطورها على إدارة حكم سليمة، نقلك غير كافي، أنا حسب رايي أنا، نقلك غير كافي لأنو فما حلقة ناقصة، اللي هي ما نخلطوش الحابل بالنابل، ما نرجعش ناس البارح في الأيام متورطة في دولة في حكم في قرارات في قروض، في اتفاقيات في تسمسيرة سامحني في الكلمة في رشوة إلى آخره، نرجع نفس الأشخاص هاذوما، بش يديرولي المرحلة القادمة؟... مثلا بن علي وقتلي عرف روحو بش يطيح مشى عمل هيئة متاع مكافحة فساد متاع عبد الفتاح عمر الله يرحمو، وكانت هيئة كبيرة وناجعة والتقرير متاعها نشهدو بيه لليوم، أحنا عنا الأجهزة متاع الدولة متوفرة عندها كل التقارير اللي تتصور في بالك.. هاك شفت القارب المثقوب متاع رئيس الجمهورية، هههههههه دبوزة الزيت اللي وصلت للعطار، يا سيدنا راهو فما دبوزة زيت هذت على عطار متاع حي الانطلاقة هيا ننطلقو من غادي، انت فقط تتوجد إرادة حقيقية للخوض في هذه الملفات ههههه"...