وقال بن حميدة:" نعتبر أنو نهار 14 جانفي مش بش يكون نهار للاحتجاج فقط، لا لا، فما جزء كبير من التوانسة هو يوم للاحتفال بالثورة التونسية، لأنو سقط نظام بن علي نهار جانفي، في ثورة انطلقت يوم 17 ديسمبر، وبالتالي هاذاكا علاش نحتفلو بـ14 جانفي، قيس سعيد قرر أن يكتب التاريخ لفترة لأنو التاريخ ما تنجمش تكتبو كيما تحب الله غالب، وبش يرجع الاحتفال بـ14 جانفي كيوم وطني إن آجلا أو عاجلا، بش يخرجوا التوانسة لأنو من حقهم أنهم يخرجوا لأنو الشارع متاعهم، ومن 2010 و2011، عاودوا فكوا الشارع، التوانسة راهو في الثورة هاذي فكوا حاجتين الفضاء العام وصوتهم اللي كانوا مخنوق واللي تسرح ولن يكون نهار السبت الجاي استثناء... التابلو مزيان لكن فيه بعض الصعوبات، للأسف مناسبة احتفالية وطنية كبرى بش نكونوا فيها ونمشيوا فيها ماناش موحدين، بمعنى أنو عندك نبيل الحاجي التيار ومجموعة الأحزاب الخمسة للاحتجاج ضد قيس سعيد ورحيلو، من حقهم، من جهة أخرى جبهة الخلاص بمعنى حركة النهضة، نسمع في فيديو متاع نور الدين البحيري يدعو إلى الخروج ضد الانقلاب وضد قيس سعيد، لكن الأخطر من ذلك أنو يعتبر أن الخروج هو فرض عين، هذا المفهوم الديني كي تدخلو في عملية سياسية لأنو في مظاهرة مبعد تحكيلنا أنو حركة ديمقراطية، يعطينا مرة أخرى ازدواجية الخطاب، ومالعباد اللي خارجة عبير موسي اللي يبدو أنها ما نجمتش تمشي لقرطاج منعوها من رخصة التظاهر في قرطاج ممكن نلقاوها في شارع الحبيب بورقيبة اللي بش تحمل نفس الشعارات تقريبا ضد قيس سعيد، باهي أيا الكلكم ضد قيس سعيد لكنهم مشتتين ومش موحدين، النهاية باهي قيس سعيد انتهت صلوحيتو أما بش تعرفو انتوما أنو انتهت صلوحيتو تي هاكم رفضتو تدخلو للانتخابات وعلاش ما تستناوش الانتخابات الجاية بش تنافسوه... في الاحتجاج حقهم وفي الشعارات عندهم الحق، تبقى سياسيا ما نراش الجدوى هاذي لأنو اليوم السيد هذايا إما تطلب وتبقى في النقطة هاذي متاع المطالبة بانتخابات سابقة لأوانها، أو انتظار الانتخابات الرئاسية والمنافسة، أما تقلو توة تنحي، فما وحدة قاتلو تنحي وتحط في بلاصتك نجلاء بودن، توة أحنا على الأقل ساعة ساعة يكلمنا بعد نص الليل، إي مع نجلاء بودن بش نعملو الصمت المطبق، للأسف الخوف أ،و نهار السبت بش يهبطوا توانسة للاحتفال ماهمش بش يلقاو رواحهم مع حتى حد، من الأحزاب والتنظيمات، أنا هابط نهار السبت للشارع للاحتفال بالثورة، مع مجموعة من أصحابي بش نعملو قهوة"...