وقال بن حميدة:" النقاط الـ3 اللي حكا عليهم الرئيس هي الوضع الاقتصادي والاجتماعي والقضاء والمضاربة والاحتكار، في التلاثة مواضيع هاذوما مش أول مرة يحكي عليها الرئيس وفي كل مرة يحكي عليها، تحس اللي رئيس الجمهورية اللي نعرفو أنو يتحكم في كل شي ويقرر كل شي يحب يعطينا الانطباع أنو هو خاطيه الوضع هذا ما هوش هو متسبب فيه ومسؤول عليه، رئيس الجمهورية ياخي هو في المعارضة، يجب يعطينا الانطباع اللي هو في المعارضة أو هو في الجهة المقابلة للحكومة اللي هو عينها وهي تأتمر بأوامرو... وراني معاكم ضد الحكومة هي المشكل أنو الحكومة انت عينتها وانت تعطيها التعليمات، وهي تنفذ في قرارات متاعك إذن الأمور ما تقابلش هو إلى حد الأن التكتيك التواصلي هذا قاعد ناجح مع رئيس الجمهورية لكن هذا ينجح لفترة من الفترات، باعتبار أنو ما مسش من شعبيتو، أما يقول للتوانسة، أسمع أنا راهو مشاغلكم نحملها معاكم، إي أما المشكلة في الأخرين اللي هو عينهم ويأتمرو بأوامرو هذا ينجم يمشي لفترة.... رئيس الدولة في إطار سياستو الشعبوية، وكي نقولو شعبوية راهو توصيف مش نقد، في إطار سياستو الشعبوية عندو استراتيجيا اللي قاعد يمشي فيها ... جوهر الشعبوية أنو هو يقوللهم أنا معاكم في مشاغلكم ضد عباد أنا حطيتهم ويأتمرو بأوامري وينفذوا في تعليماتي، إذن هذا نجح معاه لحد الآن، لكن الخطة التواصلية هاذي ما تنجمش تمشي لبعيد، فما وقت مالأوقات الناس اللي بش يتوجهلهم عموم الشعب بش يقولو نوقفو الحساب، ياخي انت رئيس الجمهورية وأحنا حطيناك رئيس جمهورية، ما نحبش نقول وقتلي يجوع الشعب أما وقتلي تكبس عليه السنتورة مليح"...