وأضاف سفيان أن أكثر ما يحزنه حقا هو حال تونس، والذي تبين للمرة الألف أنها تستحق مسؤولين أفضل بكثير ممن يشرفون على تسيير شؤونها اليوم.
وقال بن حميدة:" اللي شفناه النهارين متاع العيد، يأكدلنا إنو خرجنا من منطق السياسة ومن منطق التكمبين اللي ديما موجود في السياسة، وخرجنا حتى من منطق الضربان تحت الحزام اللي هو شكل من أشكال العمل السياسي اللي ندينوه لكن نعرفوه موجود 
وصلنا ودخلنا في مرحلة أنو نهزو العباد للموت بش أحنا نرشمو على بعضنا، اللي صار هو أنو وزير الصحة ورئيس الحكومة علاقتهم سيئة وهذا نعرفوه، وأنو رئيس الحكومة مش ممكن يكمل برشا مع وزير الصحة والعكس بالعكس، لكن استغلال عملية متاع تلقيح اللي فتحوها أيامات العيد لتصفية الحسابات بهذا الشكل هو اللي قلق، الساعة أولا من جهة اللي خذا القرار، الساعة ايجا نتفاهمو على أنو وزير الصحة ماهوش نقطة مضيئة، ونغتبروه في أداؤو فاشل كبقية الحكومة متاع المشيشي وعلى رأسها هشام المشيشي. لكن تخذا قرار م المفروض وأنو القرار يتنظم، يبدو انو القرار تخذا بسرعة كبيرة متاع إنو نزايدو على بعضنا، أنو هشام المشيشي ما فيبالوش مش صحيح، في بالو،  في بالهم وهشام المشيشي راهو أشار للموضوع في الكلمة متاعو ليلة العيد، مش يقول ما فيباليش، اللي خلا  الأمور توصل للشكل هذا أنو يبعثو عباد، ورئيس جمهورية اللي للمرة الألف يحكي على حاجات مبهمة هو وحدو يعرفها وتهم التوانسة ويقرر انو ما يعطيش المعلومة للتوانسة قال أنو راهو بعثوهم وأنا متأكد اللي بعثوهم".
كما اتهم كرونيكور 90 دقيقة من وصفهم "بالماكينات بتحريك الموضوع قائلا :"المناطق اللي صاروا فيهم أكثر فوضى وتكسير مناطق معروفة بسيطرة حركة النهضة عليهم، لكن الموضوع هذا ينجم يكون في إطار السياسة والتكمبين السياسي معقول ونعرفو أنو حركة النهضة تحب تطيح وزير الصحة، بسبب مشكلتو مع مدير الديوان اللي هو نهضاوي، هذا الكلو كوم ومفهوم ومقبول، أما رانا وصلنا إلى مرحلة بعثنا توانسة أغلبهم شباب باش تلموا متاع الشكل هذاكا بش ولاو بؤر متاع عدوى وكانت الأمور تنجم تطور إلى أسوأ من ذلك".
وتابع:" أنا راهو ما يقلقنيش أنو أطراف سياسة أو أحزاب تكمبن على بعضها، ما يقلقنيش بالكل لأنو داخلة في اللعبة اللي يقلقني أنو يمشيوا مواطنين واللي اغلبهم صغار، وأحنا في فترة اللي المتحول دلتا يمس برشا الصغار، نلموهم بالشكل الحاشد هذاكا بش نرجعوا منهم بؤرة يعني نلعبوا بأرواح التوانسة باش نرشمو رشمات سياسية على بعضنا وهذا مش مقبول تماما".