وقال بن حميدة:" إذن رئيس الجمهورية عندو معطيات، أولا هاذي فلوكة تهز 7 مالناس ركبوا فيها 18، تقولش عليه هو فما عملية حرقة الفلوكة تخرج بالعدد متاع الركاب تقولش عليهم في سينما وبالأرقام وكذا تي ماهو فوق بعضهم يبداو، معناها الوضعية هاذي ما يلزمهاش تحقيق كبير راهو، النقطة الثانية قالولوا السيد الأحوال الجوية خايبة، إي وقتاش يخرجو هوما ماهو وقتلي الأحوال الجوية تبدا خايبة بش الحرس ينقص مالعسة وهذاكا علاش برشا منهم يموتو، ثم كيفاش عرف الرئيس اللي هي الفلوكة منقوبة، كيفاش عرف وقتلي في أوراق القضية الفلوكة مفقودة، كيفاش عرف؟، مخبيين مالا، مالا الفلوكة موجودة ومخبيينها على القضاء، كي هو يقول الفلوكة منقوبة معناها هو يعرف وين الفلوكة وثبتو فيها اللي هي منقوبة، إذن القضاء يلزم يكون عندو الفلوكة هاذي بش يثبت فيها... بالنسبة للفلوس، إي الفلوس 100 مليون وموجودين وقالك عندنا الأثر متاعها، إي هاو مسؤول في المنتدى الاقتصادي والاجتماعي اليوم قالك اللي راهو كي الـ100 مليون هاذيكا موجودة في الحساب وراهي تبرعات بش عاونا بيها الأهالي بش يلوجو على المفقودين، تعرف اللي في جرجيس، أكبر عملية مواطنية صارت، إنو البحارة هبطو يلوجوا بالفلايك متاعهم وهاذاكا يلزمهم مازوط وإيسونس وكذا.. زيد على هذاكا دفن الضحايا في مقبرة الغرباء، الله يخليك ياخي هوما يتدفنوا هكاكة، ياخي الأهالي آش طالبين؟، طالبين أنو وكيل الجمهورية والحرس اللي آذنو بدفنهم يستمعو ليهم، اللي يزيد على هذا الكل على تأجيج الوضع اللي يفسر أنو اليوم والبارح الدنيا قايمة وما قعدتش في جرجيس، أنو لليوم رئيس الجمهورية ما تعناش لوجيعة الناس في جرجيس ومشالهم بالرغم من أنو راهو مشى لجربة وقعد فيها نهارين"...