وقال بن حميدة:" الرائد الرسمي للأسف ما عادش محترم، لأنو رائد رسمي يهبط فيه دستور فيه مبعد 46 غلطة يتصلح، ما عادش تنجم تحترمو يلزم تثبت فيه مرة واثنين و3، أحنا كنا حتاكش لـ25 جويلية شدة ما تهبطش ناقصة في الرائد الرسمي... اللقاء متاع الرئيس وسي بوعسكر البارح، أي شدد على القانون، توة انت تتصور سي بوعسكر فك صلاحيات الهايكا وحطها لروحو وحدو بقرار سيادي متاع الايزي، ياخي هوما قادرين الايزي بش يحطو خيط في إبرة من غير موافقة رئيس الجمهورية، هو صادق الرئيس لأنو يحب المؤسسات الوسيطة الكل يدقدقها، كيما الهايكا، راهي هيئة دستورية نحاها مالدستور، هاذي مواصلة لمنطق، اليوم معناها سامي بن سلامة عضو نصبو رئيس الجمهورية بش يتعدى قدام فرقة مكافحة الإرهاب، البارح نسمع في تصريح متاع الناطق باسم الايزي يقول لا بش يتعدا على قضايا تهم الحق العام، توة هوما 14 تهمة ولا قداش هوما قدموهم بيه، قالك هاذم قضايا حق عام، وحسيت بحاجتين تقزز أولا، ثانيا رجعت بيا الذاكرة لفترة نظام بن علي، اللي وقتها مستحيل العباد تتحاكم على قضية حرية تعبير ولا قضية سياسية الكلهم يتحاكموا قضايا حق عام، أي استعمال القضاء بشكل فج ومبعد يقلنا ما بيناتنا القضاء"...