وقال بن حميدة:" بش تصير زيادات أخرى في البترول وكي تصير الزيادات المواد الأخرى الكل بش اتبع ... إي بيان وزارة الطاقة كاذب ومغالط ومناور خاطر يحكيلك أنو الزيادة بش تفوت 100 دولار اليوم في السوق العالمية المؤشر مؤشر انخفاض لأسعار النفط أحنا اليوم في حدود 85 دولار برميل برانت، لا مش خاطر قاعدة تزيد الأسعار العالمية، ثم أنو لواش القرار متاع التعديل الآلي رجعتوه من 5 إلى 7 بالميا ياخي انتوما احترمتوه ياخي المرة اللي فاتت ماكم زدتو 10 بالميا مرة واحدة، توة فقتو اللي راهو مخالف للقانون، وفما قضية، النيابة العمومية يظهرلي مازالت ما فيبالهاش بيها، قدمتها منظمة من المنظمات، ثم أنو قادرين بش تصارحوا التوانسة ولا اللي راكم انتوما تلامذة نجباء متاع صندوق النقد وقاعدين تنفذوا في الاتفاق اللي ما بينكم وما بينهم، لأنو ماهوش ما بين التوانسة وصندوق النقد لأنو التوانسة ما فيبالهمش بيه، حتى نشوفوه ومبعد نقرروا يولي متاعنا ولا ونمشيوا فيه وإل لا... الخطاب المزدوج والمراوغ من جهة الحكومة وتحكيلك على الوضع الدولي وانعكساتو علينا وكذا ومن جهة أخرى عنا خطاب رئيس الجمهورية اللي يحكيلنا على الناس هاذوما اللي ما نعرفوهمش شكون اللي هوما يعلمهم الجميع وياكلوا في قوت التوانسة... اللي قول يجوعوا في التوانسة في الحقيقة أنا ما نعرفش الجماعة هاذم الذي يعلمهم الجميع، اللي نعرفو وقاعد نشوف فيه أنو الحكومة بالترفيع كيما اللي صار اليوم في المحروقات، بش تكون عندها انعكاسات مباشرة على عديد المنتوجات الأخرى، الحكومة هي اللي تجوع فينا، يا رئيس الدولة هانا لقيناهم الحكومة متاعك هي اللي تجوع في الشعب التونسي"...